NBA-ah player tha an awm a, a tha bik an awm. Chutihrualin basketball-ah chuan star player zingah pawh hun pawimawh a team khaiding theite an hlu zual. Chutiang player chu Jimmy Butler a ni.
Kum 33 mi hian Miami Heat chu ‘comeback’ ropui a neihpui a. NBA Playoffs a a chetthat theih em avanga “Playoff Jimmy” tia an sawi thin hian 119-114 in champion tura rin hlawh tak Milwaukee Bucks lakah a team a chakpui a. 3-1 in series-ah hma an hruai.
“Jimmy Buckets”
Eastern Conference First Round game 4-ah hian Miami in Kaseya Center-ah Bucks an mikhual a. Butler-a’n NBA Playoffs inkhel vawikhat a point a score hnem ber tum a hmang – point 56 a score.
Hei hi NBA Playoff inkhel pakhat a player in point a score hnem ber palina a ni a. Quarter hnuhnung berah Heat hi point 14 a hniam zawk an ni hman chungin Bucks an barakhaih a, chiang takin an lehthal.
Butler-a point 56 hi Heat player in Playoffs a point a score hnem ber record a ni bawk a. Hei mai hi ni lovin tun season a fourth quarter a ‘comeback’ an neih ropui ber a ni. Bucks hi tun best-of-seven series-ah hian an tlawm leh a nih chuan an tla tawh dawn.
Butler chuan inkhel zawhah, “Kan theihnaah kan chiang. He team pawn lam ami emaw, team dang player-te emaw, team dang zawng zawngin hlauhawmah min ngai lo pawh a ni thei. A pawi kan ti lo. Kan inhria a, kan theihna hi a tak ram chantir tura kal zel bak hi duh kan nei lo.” tiin an chak chhan a sawi.
NBA in kum 1984 a Playoffs a team 16 inel tura a duan hnuah first round-ah seeded no. 8 in seeded no.1 laka 3-1 a series hma a hruai tum nga na chauh a ni.
Butler hi Heat offense mawhphurhna latu a ni a, rebound vawi kua a lak bakah vawi 28 field goal a shoot atang vawi 19 a lut a, free throw vawi 18 a hmuh atang 15 a lut.
Bucks tan Brook Lopez chuan point 36 leh rebound 11 a la a. Giannis Antetokounmpo chuan match hnih a khelh loh hnuah point 26 score in rebound 10 leh assist 13 a nei a, a triple-double hi hnehna chan nan a tawk lo.
Bucks leh Heat te hi naktuk zing dar 7-ah an inkhel leh ang.
Lakers an cho sual?
Kuminah NBA team naupang leh hmuhnawm an awm, chu chu Memphis Grizzlies an ni. West-ah pahnihna an nih avangin inrintawkna an ngah a, tumah an hlau lo.
Tawnhriat ngah LA Lakers tan season awlsam a ni lo, mahse Playoff basketball chu a dang. Naupang thaza aiin puitling tawnhriat a pawimawh tawh. Grizzlies in Lakers cho viau mahse 3-1 in Lakers in hma an hruai.
Thawhlehni zing inkhelah 117-111 in overtime-ah Lakers in an khingpuite hi an hneh a, conference semi-finals lut turin vawikhat chak chiah an mamawh tawh.
Lakers tan LeBron James chuan point 22 leh rebound 20 a la a. Defense-ah pawh a puizia a tilang.
Austin Reaves chu offense-ah a che tha, point 23 leh assist vawi 6 a nei a. An ‘game’ siamtu atan an ring nasa telh telh a, a rintlak tih a lantir nawn.