- Ruata
India rama car te ber tur MG Comet EV chu a man tur company lamin an puangzar ta a, he electric car thar tur hi Rs. Nuai 7.98 (ex-showroom) man atangin a intan dawn a ni.
MG Comet hi Indonesia market lama MG company zawmpui tho, Wulung Air EV tihchhuah mek nghahchhana duan a ni a. Khawpui tawt tak kara veivahna tur deuha duan niin a te fel et a, a chhung erawh nuam pangngai taka chuan theihna a ni dawn a, a mawiin a chhung pawh an ti changkang nuam viau a ni. MG lirtheite hi Mizoramah pawh an mikhual lo a, tunah hian an SUV thar te pawh kan hmu leh nawk tawh a, India rama an lo luhna pawh a rei ve leh ta deuh a, company hlun leh rintlak a ni a, Mizoramah pawh kan lei sup sup lo ang tih a sawi theih loh a ni.
Electric lirthei chhuak mek dang nena khaikhin chuan Tata Tiago EV leh Citroen eC3, a indawt danin Rs Nuai 8.69 – 11.99 man leh Rs Nuai 11.50 – 12.76 lakh man te nen a inel thei ang a. Hetihrual hian heng kan tarlan te hi chu lirthei size pangngai ang a ni a, car te leh changkang bawk si duh tan chuan MG Comet hi a tha viau dawn a ni.
MG Comet EV hian 17.3kWh battery pack a nei a, hei hi tualchhung atanga lak niin Tata AutoComp atanga lak a ni a. He battery pack hi IP67-rated niin tui leh boruak khu lakah pawh him tura duan a ni a. He MG’s electric car thar hian vawikhat charge full-in km 230 (ARAI-certified) a tlan thei dawn a ni. Single, front-axle electric motor neiin hei hian 42bhp leh 110Nm torque a pechhuak thei dawn a, a hmaa Maruti 800 chhuak thin khan 37bhp power a pechhuak thei a, heti a nih chuan Maruti 800 aiin a power pekchhuah theih hi a sang tha dawn viau tih a lang a. Electric scooter lamah Ather te pawh tlang ramah a chakin a rintlak hle tih mit ngeiin kan hmu chho ta a, he car pawh hi a laktlak viau a rinawm a, amaherawhchu a man hi a to hret thung a ni.
Automatic gearbox hmang a ni dawn a. Type 2 charger connection neiin darkar 5 atanga darkar 7 chhungin a in charge full thei dawn a. Braking lamah chuan a hmalamah disc leh a hnunglamah drum a hmang ang a, suspension lamah chuan a hmalamah McPherson Strut leh a hnunglamah Multi-link coil te a hmang dawn a ni.
A chhunglam chu tarlan tawh Wuling Air EV nen a inang deuh chiah dawn a. Dual 10.25-inch floating display a nei ang a – pakhat chu infotainment unit niin pakhat chu digital instrumentation atan a ni thung a dawn a. A infotainment system hian voice command a nei a, thildang tam tak a kengtel dawn bawk a ni. He EV car te chi hian two-spoke steering wheel, control button awm tel a nei a. Connected feature 55 chuang neiin hetah hian wireless Android Auto & Apple CarPlay connectivity, USB port pathum, manual AC control, keyless entry leh reverse camera leh sensors, dual front airbag, ABS with EBD leh tyre pressure monitoring system te a nei dawn a, a changkangin a him viau dawn a ni.
A dung a vang leh a san zawng hi a indawt danin 2974mm, 1505mm leh 1640mm te a ni a. A wheelbase hi 2010mm niin a kual zim theih dan ber, turning radius hi 4.2m a ni a. Rawng chi 4 – Starry Black, Aurora Silver, Candy White, Candy White & Starry Black leh Apple Green & Starry Black te a awm a. Sticker styles chi hrang hrang – Night Café, Youth, Day of Dead, Space, Blossom leh Loresta a awm a, Lit Pack chi hrang hrang – Serenity (Green), Flex (Red), Beach Bay (Blue) leh Sundowner (Orange) a awm bawk a ni.