Indian tam tak, minister pawh telin, German chanchinbu pakhat, Der Spiegel-in cartoon a tar lan dan chungchang avangin an lawm lo va, hnam inhmuhsitna lam hawi niin an sawi.
Cartoon-ah hian Indian rel tawng chhe tawh takah a pindan leh a chung zawng zawng khat veka mi an chuang laiin Chinese rel thar leh nalh tak a tlan pel lai tihlan a ni.
He thil hi India-in mihring cheng tam lama China a khum tihlanna niin nuihzatna rawng kaia tihlanna nia ngaih a ni.
Der Spiegel hi chawlhkar khata vawi khat chhuak a ni.
Indian tam tak chuan Twitter-ah he chanchinbu hi India chungchanga ngaihdan hlui tak la nei reng, tun hnai kum tam tak chhunga a than dan hre thiam miah lovah an puh hlawm a ni.
Union Minister Rajeev Chandrasekhar chuan, “India nuihzat i tum dan hi a rintlak loh va, Prime Minister Pu Narendra Modi hnuaia a tun hnaia a dinhmun i hre lo a ni a. Kum tam vak lo liam ta atang khan India economy hi Germany aiin a lian daih tawh zawk a ni,” a ti.
Information & broadcasting ministry-a hotu lian pakhat, Kanchan Gupta pawhin he cartoon tihlan a nih dan chu ‘chi inthliarna dik tak’ a ti a. Mi dang pakhat pawhin a chanchinbu ‘rilru chhungril dik tak’ tihlanna a nih thu a tar lang bawk.
Indian-ten an thil tihlan an sawiselnaah hian chanchinbu hian engmah a la sawi lo.
Indian-te hian rel tawt lutuka tihlan hi haw hle mah se an ram chhung hmun tam takah hetiang hi a la thleng reng a, hetih lai hian sorkar pawhin a kalkawng leh a rel te tihchangtlun tumin hma a la nasa em em bawk.
Khawthlang ram chanchinbuten cartoon an tihchhuah hi Indian-ten huat tak tak an lo nei tawh thin a. The New York Times pawhin kum 2014-a India-in Mars Mission a kalpui laia cartoon a tihchhuah chu India nuihzatnaa puh a nih avangin ngaihdam a lo dil tawh.
He cartoon-ah hian lo neitu pakhat bawng kaiin pindan pakhat, Elite Space Club tih intarna, a chhunga mipa pahnihin chanchinbu an chhiarna a kik lai a lang a. Hei hi India-in Mars thlawh hual tura Mangalyaan robot a kah chhuah hlim kha a ni.