AZL: Rajya Sabha MP K. Vanlalvena’n nimin khan Aizawla Pushpak Headquaters Chief Engineer Office a tlawh a, thawktute nen Mizoram chhunga an hnathawh mek leh hmachhawpte an thlirho.
An inkawmhonaah hian Project Pushpak Chief Engineer SP Kolipey chuan Mizoram hmun hrang hranga kawng an siam tawhte Rajya Sabha MP chu a lo hrilhfiah bakah kawng an sialna kawnga puih an ngaihna lai te a lo thlen a. Two lane road laih tura harsatna awm mek sutkian dan tur te an sawiho.
Rajya Sabha MP chuan Sangau to Saisihchhuah to Siallam kawng pawimawhnate a sawi bakah Kawlcho-Phura – Tongkolong kawngpui siam thatna turte pawh a sawipui a. Palak dil bula wildlife sanctuary tibuai lo tura kawng km 10 an mamawh chu hma a lakpui tur thu a hrilhin, Sairang – Tuipuibari kawng an siam tha chu lawmawm tiin, an hnathawh dan chu fakawm a tih thu a hrilh bawk a ni.