Denver Nuggets leh Phoenix Suns te chuan NBA Playoffs Western Conference semi-finals an khel dawn a. An khingpuite lakah hnehna chang ve ve in 4-1 in series an la.
Suns in 136-130 in Los Angeles Clippers lakah hnehna an chang a. Nilaini zinga Footprint Center a inkhelah Suns tan Devin Booker chu offense ralthuam langsar a ni a. Third quarter-ah che pui hle in point 25 a score a. Inkhel pumpuiah point 47 a score.
Suns tan Kevin Durant chuan point 31 a thawh ve bawk.
Clippers in an star player Paul George inhliam hnuah Kawhi Leonard inhliam leh bawk chu an tuar a. Tun tumah Norman Powell chuan point 27 score in team tana point score hnem ber a ni.
Inkhel dangah Denver Nuggets in 112-109 in Minnesota Timberwolves an hneh ve thung a. Suns nen hian conference final luh tumin an inhmachhawn ang.
Nuggets tan NBA Most Valuable Player ni lai Nikola Jokic bawk a che tha leh viau a. Point 28 a score bakah rebound 17 la in assist vawi 12 a nei a, a triple-double hi inkhel thui taka nghawngtu a ni a. Jamal Murray chuan point 35 score bawkin season nga chhunga a vawi li nan conference semi-finals an lut.