Chinese Defence Minister Li Shangfu chu ram venhimna lam sawihonaa tel turin India nena an inkar a khik lai takin Delhi a thleng.
Li-a hi Zirtawpnia India khawpui, Delhi-a Shanghai Cooperation Organisation (SCO) defence minister-te thutkhawmah a tel ang.
Kum 2020-a an sipaite an intihbuai hnua Chinese defence minister-in India a tlawhna hmasa ber a ni.
Hemi tum hian India sipai 20 vel leh Chinese sipai pali an thi.
Hemi hnuah hian ram pahnihte hi an inep zui nasa hle a, December thla maiah pawh khan hmarchhaka Arunachal Pradesh chhung, Tawang-ah an inep leh.
Ram pahnihte an buaina ber hi km 3,440 zeta thui an inrina, Himalaya tlangdung sang taka kala an inrem loh vang a ni a. Ramri hian lui, dil leh tlang sang vur khuh chin tam tak a kal kân avangin a chuang lovin a insawn zing hle a, hmun tam takah ramri chin nia an hriatah an ngaihdan a inang lo.
Chinese defence ministry chuan Thawhlehni khan Li-a hian Delhi-a conference-ah hian thu a sawi dawn bakah ‘ram hrang hrang aiawha telte nen inkawmin khawvel huap leh an inkar thil sawipuiin ram himna leh venhimna lam pawh a sawipui dawn’ niin a sawi.
Li-a’n a kawm tur zingah hian Indian Defence Minister Rajnath Singh pawh a tel.
Minister-in a tlawh hi India leh China sipaiten ramria buaina ching fel tura a vawi 18 nana an inbiak hnu lawk a ni.
India hi kum 2023-ah hian SCO chair a ni mek a. He pawlah hian China, Russia leh Asia lailia ram pali telin kum 2001-a din kha a ni a, khawthlang ram tangrual lian zel kara an tanhona a ni a. India leh Pakistan ramten kum 2017 khan an zawm ve a ni.
Russian Defence Minister Sergei Shoigu pawh Delhi-a inhmuhkhawmah hian a tel dawn a, Pakistan minister Khawaja Asif is erawh chuan ral atangin a chhim ang.
Karlehah hian Pakistani Foreign Minister Bilawal Bhutto Zardari chuan SCO foreign minister thutkhawm chu India-ah a tel dawn a, kum tam tak chhunga Pakistani sorkar mi pawimawhin India a tlawh hmasak ber a ni ang.