Himalaya tlangdunga awm, China-in ramria a inmil lohpui ram hnih zinga pakhat zawk, Bhutan chuan Beijing nena inremna neih a duh a, India a khawih dawn em hriat a la ni lo.
Khawvel huapa China lian zel chuan Bhutan hi Beijing nena inremna neih duhna a neihtir a; mahse, India hian a pawmpui dawn em hriat a ni lo.
Thimphu leh Delhi hi inkungkaihna tha tak nei niin India hian sum tam taka a puih thin bakah sipai lamah pawh a pui nasa hle bawk.
Bhutan leh China hi hmar lam leh Himalaya thlang lamah ramri-ah inrem lohna an nei.
An buaina pui ber hi tlang chung zawl, Doklam an tih mai a ni a. Hei hi India, Bhutan leh China intawhna lai a ni a. Bhutan leh China hian an ram niin an sawi ve ve a, India chu Thimphu lamah a tang bawk.
India hian Bhutan lama tan chhan a nei a. Mi thiamte chuan Doklam hi Delhi tan Chinese-ten Siliguri Corridor an luh loh nana a tih a ni a, helai hi Chicken’s Neck tih niin India ram laili leh hmarchhak state-te inkalpawhna, km 24-a thui a ni.
Tun hnai lawka Belgian chanchinbu, La Libre-in an kawmnaah Bhutanese Prime Minister Lotay Tshering an ram chuan tihtheih chin a nei tih a sawi.
“Harsatna hi Bhutan chauhvin a tihfel theih a ni lo. Pathum kan ni a, kan lian emaw, kan te emaw pawh ni se intluktlanna nei vek kan ni a. Keini chu kan inpeih a, a dang pahnih hi an inpeih chuan kan sawiho thei a ni mai,” a ti.
Bhutan leh China chuan tum khat emaw, vawi hnih emaw an thutkhawm chuan ramri chu an rin fel theih mai a beisei tih a sawi a. Heng ram hnih hi kum 1984 atang tawha ramri thila indawr tawh an ni a, Tshering hian an ramah Chinese an luh loh thu a sawi bawk.
Tshering-a thil sawi hian India beng a verh hle a, a bikin chanchinbuah a lang nasa a, sawitu tam tak chuan ram pathum inpawh tawnna lai hi Bhutan leh China hian an insem mai an hlau va. Thenkhat phei chuan Thimphu hi Doklam chungchangah nawrna a dawng nasa niin an sawi.
India palai lo ni tawh leh Himalaya buainaa mi thiam, P Stobdan chuan, “India hian anmahni tihhrehawm nan China chuan ramri chungchangah Bhutan chu nawr vak a ni,” a ti.
“Thil chiang tak chu Bhutanese-te hian an inrem lohna chu chin fel thuai thuai an duh a, hei bakah hian an dinna thin pawh China duh dan anga sawnsak an ni,” a ti.
Indian chanchinbua a thu sawi a lan nual hnuah Tshering chuan thla tirah khan, “Thil thar engmah ka sawi lo va, Bhutan dinna sawn a nih thu pawh ka sawi lo,” tiin The Bhutanese weekly hnenah a sawi.
Prime minister thil sawi hi Bhutanese tam tak mak tih a hlawh a, China dinhmun atanga thlir pawhin Delhi puihna tel lo chuan ramri tihfel chu a harsa dawn nia ngaihna a awm bawk.
Shanghai Institutes for International Studies-a mi, Liu Zongyi-a chuan, “India hi a laiah a awm mek a. China leh Bhutan hian an ramri buai hi an ching fel a nih chuan anmahni chauh an bang tawh dawn a. India hian hei hi a thlentir phal ka ring lo,” a ti.
China leh Bhutan hian kum 1996 chho velah khan an buaina hi an tifel hman tep tawh a; mahse, India a inrawlh avangin a fel thei ta lo tawh niin a sawi bawk.