Aizawl : Aizawl West II bialtu MLA, Minister ni bawk Lalruatkima’n a biala Tuikual South tlawhin, khawtlang hruaitute leh tlawmngai pawl hruaitute nen hmasawnna hnathawh tur te an enho.
Tuikual lui kama Ralliana Basketball court leh Rokunga volleyball court siamthat dan tur enhova sawihovin, he hmunah hian Mini sport complex siama, lian tham deuh zawka hmalak an rel a. Hna tan thuai thei tura bawhzui tul te bawhzui nghal ni se, an ti.
Tuikual South leh Khatla inrina ‘Char number tuikhur’ an tih mai bawra hmasawnna hna kalpui dan tur pawh enhovin, a rang thei ang bera hmalak ni se, an ti bawk.
Lalruatkima chuan Mizoram hmun hrang hrangah hmasawnna hna kalpui zel a nih thu sawiin, MLA bial hrang hranga khua leh veng hrang hrangte tuam mek a nih thu a sawi a. “He sorkar hi- an kan hnam, kan sa- khaw himna leh ram hmasawnna hi a vei ber a ni” tiin, a thil vei ber tihlawhtling tur chuan theihtawpa hma an lak zel thu leh a rah hmuh tur pawh a tam tawh thu a sawi bawk a ni.