Aizawl: Rastriya Uchhatar Shiksha Abhiyan (RUSA) 2.0 sum Rs nuai 100 senga sak Govt. Champhai College Commerce building thar chu nimin khan Higher & Technical Education Minister Dr. R. Lalthangliana’n a hawng.
Govt. Champhai College Commerce building thar hi Sky Ridge construction & consultancy services, Aizawl-in an sak niin, October 24, 2019-ah hna tanin kumin February 28 khan an zo fel a. A chung lam leh sir lama zauh theih tur leh seismic zone 5 dinhmun mila sak a nih thu sorkar thuchhuah chuan a tar lang.
Building thar hawngtu, H&TE Minister Dr R Lalthangliana chuan zirlaite chu khawvel changkang zelah zirna atana an mamawh hrang hrangte awlsam taka chhawpchhuahsak an nih thu leh an banphak maia hmanraw mamawhte a awm tawh avanga an vanneih zia inhre thara, hun leh hmunhma tha an neih te khawhral mai lova, thiamna tak tak zir nante, mi danglam leh tha bik ni thei tura tanlak nantea hmang tur tein a chah.
Govt. Champhai College hi August 6, 1971-a din niin, NAAC Accredited B++ a ni mek a; Science, Commerce, Arts leh BCA zir theihna a ni mek a ni.