Commerce & Industries (C&I) Minister Dr. R. Lalthangliana chuan ramri insumdawn tawnna kawngah mipui eizawnna tibuai lo leh khaihlak lo tura hmalak chu sorkar duh dan a nih thu a sawi.
Nimin zing khan Dr R Lalthangliana hian Champhai district chhung Indo-Myanmar ramri depa awm insumdawntawnna kawnga pawimawh tak Zokhawthar khua tlawh a. International Border Trade tihchangtlun nan cheng nuai 1,500 in Zokhawthar Land Custom Station tihchangtlunna kalpui mek a nih thu a sawi a. He’ng bakah hian India rama International Border Trade lian tham zawk kalpuina tur hmun 25 tunhnai maia thlan chhuah zingah Zokhawthar leh Zorinpui te thlan tel an ni chu lawmawm a tih thu sawiin, he’ngahte hian border trade tihhmasawnna tur project lian tham zawk kalpui tum a nih thu a sawi.
Law & Judicial Minister T.J. Lalnuntluanga pawhin thu sawiin, Zokhawthar kaltlanga sumdawnna tun aia tihchangtlun dan tur ngaihtuaha hmalak mek zel a nih thu a sawi a. Ramri dep khaw pawimawh tak a nih avangin sumdawnna mai bakah inkalpawhna, transportation, infiamna, zirna leh hriselna lama hmasawnna ruhrelte pawh tih hmasawn tel ve zel a tul thu a sawi.
SASCI sum hmanga hnathawh mek ‘Inftrastructure Development for border trade facilities/Land Custom Station’ chu hi Lushai Engineers-ten Rs vaibelchhe 15 senga an thawh a ni.