Aizawl: Home Minister Lalchamliana’n, “Mipuiin bus leh commercial vehicle dangte hmang uar ila, mahni lirthei chetchhuahpui tam lo ila, traffic tawt zualpui chu a ziaawm phah deuh ka beisei,” a ti.
Aizawl City Bus Owners’ Association (ACBOA) general assembly nimina Kulikawn YMA hall-a neih a hmanpuinaah he thu hi home minister chuan a sawi a. Aizawl khawpui chhung traffic jam nasa lutuk tiziaawm tura ngaihtuahna hrang hrang an sen thin thu sawiin, tun hnaiah pawh Gauhati High Court Aizawl Bench-in chief secretary chairman-na hnuaiah traffic management committee din tura state sorkar a hriattir thu a sawi.
Home minister chuan city bus khalhtu leh conductor-ten mihring phur lirthei an enkawl kawngah hma an sawn tawh hle nia sawiin, mipuiin driver leh conductor-te lakah pawh complaint an nei mang tawh lo niin a sawi a. Kum 50 tling tawh ACBOA-in kawng hrang hranga hma a sawn chhohna chu ropui a tih thu sawiin, bus neitute chu an bus enkawltuten traffic dan an ngaih pawimawh zel theihna tura tan la turin a chah a, an mi chhawrte lakah ngilneihna lantir thin turin a chah bawk.
ACBOA inkhawmpui chawhma hun chu an President PC Zoliansanga’n a kaihruai a, an pawl ziaktu leh sum enkawltuten report an pek bakah an member chatuan ram pan tate sunna hun an hmang a. Chawhnu lamah kum 2023-2025 chhunga an pawl hruaitu tur thlangin, ro an rel bawk.