Barcelona in La Liga champion thar ni tura an nghah chhung a rei loh zawkna turin hnehna chang thei an nihlaiin an huntha an chhawr tangkai thei lo. Rayo Vallecano nen inkhelin 2-1 in an tlawm.
Nilaini zanah Estadio de Vallecas-ah Barcelona hian point 14 a hma hruai fal theihna hun an nei a, mahse an huntha neihah chesual thungin Rayo in European football season tharah an la beisei ngam phah.
A zawna league a match sarih tlawm lova kal tawh Barcelona hneh turin Rayo an huaisen a. Kawng engkimah an inkhelh chhungin a kheltha zawk an ni.
Minute 19-naah Alvaro Garcia hmangin goal hmahruai an khung a. Second half tan hnu lawkah Fran Garcia chuan an goal hnihna a khung ve leh a. Barcelona tan hian striker Robert Lewandowski chuan huntawp dawnah goal khat a khung.
Barca manager Xavi Hernandez chuan, “Kan kheltha lo. Inkhelh chhung zawngin kan duh anga inkhel turin kan insiamtha hman lo. Kan chance neih chhun kan khung thei si lova, goal hnihna a lut leh si khan nasa takin min nghawng. A chak phu zawk an chak.” a ti a.
“Kan hmabak a la thui a, engmah a la chiang lo. La Liga hi tu ta mah a la ni lo.” tiin an dinhmun tha mahse a tawp an la thlen loh thu a sawi bawk.