Department of Forestry, Fisheries & Environment (DFFE) South Africa chuan tun hnaia Madhya Pradesh-a Kuno National Park cheetah pahnih thi chu hmun dang atanga lak luh an nih avangin a nih dan tur ve reng niin an sawi.
DFFE South Africa-in Ningania thuchhuah an siamah, “Cheetah-te hian Namibia atanga September, 2022-a lak luh pariatte chu Kuno National Park-ah an zawm a. Pahnih (Namibia leh South Africa atanga lak luh pakhat ve ve) an thi hi ram dang atanga lak luh an nih anga hetiang hi thleng ve tur reng a ni,” an ti.
“Sa ei hi ramsa lian awm thartir leh tumna ang hi fimkhur ngai leh risk sang tak a ni a. Khungna hmun atanga hmun zau zawka chhuah lai hi a harsa lai tak, ni tina an dinhmun thlithlai a buaithlak lai tak pawh a ni,” an ti.
South Africa atanga thuchhuah chuan inhliam leh thihna chu a pung theih tih sawiin, chu chu hmun thara awm thartir leh tumna kawnga a risk sang lai ber a nih thu an tar lang.
“DFFE chuan cheetah thi endikna kan nghak mek a, tuna kan hriattheih chinah chuan inkai theih natna emaw, a dangte tana hlauhawm tur ang emaw a awm kan la hre lo,” an ti.
South Africa atanga lak luh, Uday tia a hming an sak hi kum ruk niin April 23 khan a thi.
March 27 khan kum ngaa upa, Sasha chu a ni thi bawk a. Hei hi Namibia atanga lak luh ve thung niin January atanga a kal tha lo vanga thi nia hriat a ni.
Kumin kumtirah khan South Africa leh India hian Memorandum of Understanding (MoU) on Cooperation on the Re-introduction of Cheetah to India an siam.
MoU-ah hian ram pahnihte hian India-a cheetah tihpun leh tum a ni a, inthleng tawn leh inenkawlpuia cheetah humhalhna kawnga thawhhona a keng tel.