India khawpui, Delhi-a police chuan Supreme Court hnenah an rama wrestling federation cheif lakah thubuai an ziah luh dawn thu an hrilh.
Court hian hmeichhe wrestler laka mipat hmeichhiatna hawia Brij Bhushan Singh-a chetna chungchang wrestler langsar tak takte petition a thehluh a ngaihtuah.
Singh-a chet dan chungchangah hian lungawi lote hian police hnenah vawi tam complaint thehluh a nih hnuah pawh thubuai ziah luh a ni lo niin an sawi.
Singh-a hian a chet dan nia an sawi hi a pha.
Wrestler-te hian January khan lungawi lohna an lo lantir tawh a, sorkarin an thil phutte ngaihtuahsak a tiam avangin an tawp.
Mahse, kar hmasa atang khan inhawr khawm lehin Wrestling Federation of India (WFI) chief laka a rang thei ang bera kutthlak an phut a. Singh-a hi rorel lai, BJP MP a ni mek bawk.
Court sang ber chuan wretler-te petition thehluh chu ‘thil pawimawh tak’ anih thu sawiin Delhi Police chu insawi fiah turin a ti nghal a. Police chuan thubuai siam a nih hmain ‘preliminary enquiry’ a ngai phawt nia sawiin, chumi hnua court-in ti tura a tih ang ti turin an inbuatsaih niin an sawi.
Zirtawpni khan Delhi police hian Supreme Court-ah ni a liam hmain Singh-a lakah thubuai an ziah luh ngei dawn thu an sawi leh ta a ni.
Ningani khan Indian Olympic Association (IOA) president, India-a infiammi ngaihsan hlawh ber pakhat, PT Usha chuan khwalaia lungawi lohna an lantir avangin ‘ram hmel an timawi lo’ niin a sawi a. IOA hnuaia athletes’ commission erawh thil en zui turin a ti bawk.
Usha thil sawi hi eptu politician leh wrestler lungawi loten an an sawisel nasa hle.
Congress hruaitu, Shashi Tharoor chuan India hmel chu wrestler-te thil phut tihhlawhtlin loh a nih chauhvin a mawi lo zawk dawn niin a sawi.
Olympic medallist, lungawi lohnaa tel ve, wrestler Sakshi Malik chuan buaina siam lova an duh dan lantir chu discipline awm lo anga sawi a ni chu engtin nge a nih theih tih a zawt a. “Hmeichhe infiammi a ni a, a hmeichhiatpuite aw pawh a ngaithla lo,” a ti.
Wrestler-te hian infiammi langsar tak takte thlawpna an hmu nual a. Fei khawha Olympic hnuhnung bera gold medal latu, Neeraj Chopra chuan India-a infiammiten an thil phut kar nana khawlai an chhuah a ngai ta hial chu pawi a tih thu leh thuneitute pawhin ‘thleina awm lo leh langtlang takin; ching fel se a duh tih a sawi.
Olympic medallist tho, Abhinav Bindra pawhin infiammite thil phut chu ‘ngaihthlaka dik leh tumah duhsak lova chin fel ni se’ a ti a. Tennis star Sania Mirza pawhin ‘hun harsaaah tanho hun’ a nih thu a sawi bawk.
Zirtawpni khan Twitter-ah chuan #IStandWithMyChampions tih chu a lar nghal hle a, wrestler thlawpna tihlanna atana hman a ni.
Boxing world champion Nikhat Zareen chuan he hashtag hi hmangin a hma thei ang bera harsatna awm chu chin fel a nih a beisei thu a tar lang a. Bollywood lemchang thiam, Swara Bhasker pawhin infiammiten khawlaia lungawi lohna an lantir a ngai ta chu ‘zahthlak’ a tih thu leh ‘BJP MP chu sorkarin a hum nia a lan’ thu a tar lang bawk.