Russia chuan Kyiv leh Ukraine-a khawpui hrang hrang chu thlawhna atangin a kap leh a, mi 13 vel an thi.
Thuneitute chuan an ram lailia Uman khawpuia flat pakhat block kah fuhah naupang telin mi 11 an thi tih an sawi.
Dnipro-ah hmeichhia leh a fanu kum thum mi an thi niin mayor-in a sawi bawk.
Ukraine lailia Kremenchuk-ah pawh thil puak a awm bawk.
Ukrainian President Volodymyr Zelensky chuan thihna thlenna apartment block hi Uman khawpuia mihring chenna in 10 kah zinga pakhat a nih thu a sawi a. State rescue service chuan naupang thi hi kum 2013-a piang a nih thu leh damdawi inah mi dang 11 enkawl mek an ni tih an sawi.
Zelensky chuan tun tuma beihna an tawh leh hi khawvelin Russia laka chet vat a ngaihzia lantir pakhat a nih thu a sawi.
“Sualna hi ralthuam hmangin dan theih an ni a, chu chu kan miten an ti a. Hreknain tihtawp theih a ni bawk a, khawvel huapa hrek a ngai a ni,” tiin Twitter-ah a tar lang.
Kyiv-a sipai hotute chuan tuna kah an nih hi Russian missile-in ni 51 hnua khawpui a beih leh hmasak ber niin an sawi.
Khawpui berah hian civil mi thi an awm thu sawi a la awm lo.
Missile 23 zinga 21 leh drone pahnih chu Ukraine-in air defence system hmangin an lo kap thla niin thuneituten messaging service Telegram-ah an tar lang.
Ukraine-a State Border Service-in Telegram-a video a tihchhuahah Uman khawpuia apartment building chhe tak tak a lang.
Block chhe ta pakhata cheng, Olga chuan an tukverh chu a thlawk chhuak a, ‘a puak zui ta dur’ niin Reuters news agency hnenah a sawi.
Mi pakhat chuan tap chungin emergency services-ten hlanga ruang pakhat an zawn a tah hawm hawm lai a lang bawk.
Mi cheng dang pakhat chuan zing dar 4:30 (India-a zing dar 8:00) velah thil puak ring tak a hriat thu a sawi a, ‘na takin vawi hnih a puak a, engkim mai, car thlengin a kang zui nghal hluah hluah’ niin a sawi.
Ukraine-in beih a tawh thar leh hi Ukrainian sipaiten sipai chakna hmangin an ralthuam, khawthlang ramten an pek hmanga nawr thar leh tura an inpeih thu an puan hnu lawkah a ni.
Russia hian Kyiv a rûn meknaah hian thlasik lai khan a che tha tawk lo va, thla 10 an inbeih tawh chhungin khawpui pawimawh, Bakhmut pawh a la thunun hleithei lo.
Zirtawpnia a chet thar lehah hian Russia hian eng ber nge a tum hriat a ni chiah lo va; mahse, a hma pawhin civil mite hmunhma a lo bei fo tawh thung.
Moscow hian a hmain civil mite a bitum ngai loh thu a lo sawi tawh thin a; mahse, Ukraine an rûn hnuah mi sang chuang fe an thi tawh thung.