Aizawl: MPCC President Lalsawta chuan Serlui mipuite chu an tu leh fate tan kumin MLA inthlan lo awm tur hmachhawn turin a chah.
Zirtawpni khan Serlui Block Congress Committee Conference 2023, Vairengte Multipurpose Hall-ah hman a ni a, khuallian niin a hmanpui.
Mahni thawhchhuah thawhkhawm hmanga Serlui Block Congress Conference neih a ni chu Mizoramin politics-ah mellung thar phuntu leh hmahruaitu an nih thu a sawi a. “Hei hi Congress zia tur a ni a. He kalphung hi 2023 MLA inthlan kan hmachhawn dan tur a ni. Mizoramin politics hmel thar a hmuh châk chu Serlui bial Congress mipuiin a takin in lantir a ni,” tiin, taimakna leh dikna, huaisenna nen Serlui bial mipuite chu an tu leh fate tan kumina MLA inthlan lo awm tur chu hmachhawn turin a chah.
Mipui tana lem nuam leh kawng awlsam a tiam ve theih loh thu sawiin Lalsawta hian, “Kawng awlsam hi Lal Isua min zirtir dan a ni lo. Rim taka thawka mahni thawh chhuah eia inin, hnam taima ni turin ka duh che u a ni,” a ti.
Lalsawta hian kuthnathawktute, mi taima leh thawkrimte dinchhuahna ram din hi a tum tih a sawi a. Thu thluanga awma duhsak nghak turin engmah a tiam ve theih loh thu sawiin, “In tan ding nghet ula, rinawm ula, taima rawh u. Mi tih ang pangngai kan tih ve ringawt hian dam khawchhuahna a awm lo. Mi aia kan danglam ngam zel a ngai,” a ti bawk.
“Retheihna sal atanga chhuak turin in thawhchhuah a ngai. Dinchhuah tum, mahni inchhanchhuah tumte tan ‘Tang Puihna’ kan pe dawn che u,” tia sawiin MPCC president hian, retheihnain a sal beh, an retheihna remchanga hmanga vau beh leh rilru him pawh pu thei loa sawi thaih tawkte tan Congress party-in zalenna dar an vua tih a sawi.
Serlui bialah Congress thlipui a tleh angin India ram state lian, Karnataka leh Madhya Pradesh ah Congress a sorkar ngei dawn nia sawiin, “Kum 2024-a India rama Lok Sabha inthlanpui neih a ni dawn a. India ramah Congress kaihhruai sorkar piang thuai dawn. Eptu party hrang hrangin Rahul Gandhi chungah rinna an nghat a, opposition party lian zawng zawngin Congress kaihhruai sorkar siam duhin hma an la a. Congress sorkar a piang ngei dawn,” a ti bawk.
Serlui Block Congress Conference-ah MPCC Secretary leh Aizawl Municipal Corporation Ward No. V Corporator Rosiamngheta leh MPCC Secretary Anggu Lalhmachhuana ten thu an sawi a. President-in mi thar eng emaw zat a lawm lut nghal bawk.