Aizawl: Health Minister Dr R Lalthangliana’n nimin khan Rs. nuai 268.99 senga sak, Bungzung Primary Health Centre building thar a hawng a, hriselna chu hmasawnna tura pawimawh leh kawngro su a nih avangin an ngai pawimawh hle tih a sawi.
Dr R Lalthangliana chuan chuan damdawi in hmunhmate tihchangtlung chhoh zel an tum thu sawiin, Sesih PHC chu hun reilo teah sak tum a nih thu leh Khawbung PHC pawh sak that tum a nih thu a sawi a. JICA nena tangdunin Zemabawkah Rs. nuai 70,000 senna tur Cancer Superspeciality Hospital din tum a nih thu leh kum 2028-ah zawh fel hman beisei a nih thu a sawi.
Commerce & Industries minister ni bawk, Dr R Lalthanglikana chuan ramri insumdawntawnna sorkarin a ngaih pawimawh thu pawh sawiin, Zokhawthar land Custom Station tihchangtlun nan Rs. nuai 1,500 senga hmalak mek a nih thu te, tun hnaia India rama border trade lian tham kalpuina tur hmun 25 thlan zingah Zokhawthar leh Zorinpui a tel thu leh lawmawm a tih thu a sawi.
Bungzung PHC building thar hi NABARD (RIDF-XXVI) 2020-2021 sum Rs. nuai 268.99 senga sak niin contractor Ngurzamlova, Kolasib a ni a. December 13, 2021-ah hna tanin June 13, 2023-a zawh hman tura tih ni mah se April 24, 2023-ah a zo fel hman a ni.