- Lallunghnema, Charity Lodge
Ka article hnuhnung berah khan ka article hlui ka rawn her lum a.Kha ka thu leh hlaah khan hun kal tawha ka tawnhriat(experience) thenkhat ka rawn sawi a. Chutah chuan Kekawr thui(sewing) dik lo chungchang a complaint kan dawn thu ka rawn thailang a nih kha.
Kekawr thui( sewing)dik lo,hak hleih theih loh complaint chungchangah chuan kekawr thuitu chu kovin ngaihtuah(,hearing) a ni a. Hetih hun lai hi kei teh lul Aizawl District Consumer Court- a Member;a ka tan ve lai kha a ni a.. Ka u Thanhawla IAS pachal ve ngat nen khan consumer complaint-te chu kan buaipui nasa em em thin a.Ani,ka U hi rilru zau tak nei ,mi hau awlsam em em lawi si,nelawm tak a ni.He ka thianpa nena kan intahai nasatzia kha tlem lai deuh khan he Huangah hian ka sawi tawh bawk. Sawi a nawm em avangin ka sawi leh thin.
Tun hun thleng hian kan la inpawh tha a,chhiat, thatah kan la inhre zel a ni.Ka U hi ka ngaina a,ani pawhin min ngainain ka hre ve thin a ni.Kan buai thei viau nain kan hlim thei khawp mai. Keini thian dun kha kuhva heh a lar ve hat thin kha kan ni a. Consumer Court sitting zawh hun kan nghahhlelh ber chhan pawh kuhva hring duh tawk a ei kha a ni a. Kuhva hi kan ei sen reng ringawt mai a ni.
Mahse,Court Sitting lai hi chuan kan ei bik lo va. Tui bak kan in ngai lo. Kan invawng uluk thei hle a ni. Ukil ho pawh khan min hlau viau thin. Kan hau fo mai. Consumer Court-ah na na na hi hian President leh Member te hi chu lal tak kan ni ve. ‘Sir’ tih tur kha kan ni ve a. A nuam hrehawm a ni ber. Lawmman erawh a tam lo hle ,rin rawla hman chi a ni lo.a , khang hun lai kha chuan.
Tum khat chu nu pakhat,hmel fai deuh tak hian complaint a lo thehlut ve a, chu a complaint chu hei hi a ni.
‘Aizawl bazarpuiah hian secondhand puan than a lei a. A rawng chu a uk lam a ni. Chu a puan than hlaipui lei chu a haw hnuin kawr ilo velah thui a han tum a. Hmun hrang hrangah sazu seh ang mai hian a pawp chuk mai a. A puan leina nu hnenah chuan a va complain a. A ni puan than hralhtu nu chuan “A thleng theih tawh loh” a lo ti bul hmuk mai a ni awm a. He nu mangang hian Consumer Forum a lo pan ta a ni.
Tichuan le, consumer forum chuan kan han ngaihtuah dawn a. A puan chu a lo keng bawk a. A sawi ang tak tak khan hmun hrang hrangah a lo pawp chek chuk mai a. A zuartu nu chu koh a ni bawk a. A tawi zawngin han sawi ila, puan than zuartu chu puan than dang pe turin keini Consumer Disputes Redressal Forum lam chuan kan chalrem ta ni.
Tun tumah hian complaint naran lo tak rawn pho chhuah a ni a. Tawi tein ka sawi dawn a ni. India rama chanchin lian ber zinga mi The Hindu ni 20/4/23 chhuakah chuan he consumer case hi a rawn tarlang a. Chu chu hei hi a ni. Mi pakhat Sanjayagar a cheng mek S.N Ramesh a chuan a pami S.N Prasad hnen atangin June 5/22- ah scooter a lei a. Document chu tihfel tumin a pami Scooter leina Ola Electric Technogic Private Ltd. ah a va kal a. Mahse chhuanlam chhe tete hmangin an lo tihfel sak duh lawk lova.
Vawi tam tak motor neitu hming thlak leh thil tul dang ti tura ngenna a thehluh hnuah pawh ngaihsak a hlawh chuang lova. Chuvangin a kaw tawpah chuan Bengaluru a Consumer Court-ah chuan a lungawilohna chu thlenin Ola Company chu a khing ta a.
Tichuan, he Consumer Court hian ‘thil tih khaw tlai’ (delay in service )chu deficient service a ni tiin Consumer Protection Act, 2019 hmangin Ola Company chu hremna a pe ta a ni. Compensation Rs. 5000/- a chawitir bakah ligitation charge ( complaint buaipui nana senso)Rs. 2000/- chawi turin thutlukna a tichhuak ta a ni.
He Judgement & Order hi ni 20th April 2023 khan tihchhuah a ni. Hei bakah hian a rang thei ang bera Ramesh-a scooter document chu tihfel sak turin Ola chu thupek a ni bawk. Hetiang thil hi thleng ngai zen zel lo leh vang tak a ni a. Thil tihsak lawk loh, tih khawtlai hi consumer issue a ni tih kan lo hriat atan ka han pho chhuak a ni e.
Thu dang deuh, consumer te hmakhua (interest) ka han zep lawk teh ang.Carry bag inleitir hi Consumer Protection Act kalh anih thu Consumer Court judgement chi hrang hrang ka rawn tarlang tawh a. Vairamah chuan hetiang case hi a tam em em a. Mizoramah erawh kan hre ve meuh lo. Mahse hmanni lawka ka tawnhriat pakhat chu carry bag inlei luihtir chungchang a ni a.
Tumkhat chu Civil Hospital-ah damlo kan turin ka nupui nen kan tlai chhuah a. Mahse damlo kan hun( visiting hour) hi tlai lamah chuan a lo theih tawh lo reng reng mai a.Visiting hour hi Zing dar 6:30 – 8:30 inkar chhung a lo ni a.Tlai lamah chuan inkan an phal thak lo!. A hriat loh theih khawp mai! Mahse Damdawi in chinchang hre lo khawp hial a nasa a Pathianin hriselna min pe hi ka lawm hle ta zawk hial a ni. Damdawi In ka lo tlawh khat thei chu ka lawm lehling ta riau mai a nih chu!
Tichuan, Civil Hospital atang chuan ka nupui nen bazar-ah silipar lei turin kan chhuk thla a, silipar chu kan han en a, a tha viau mai,lei ka tum ta a.
Pawisa ka pe a, Cash memo ka dil a. Min pe nghal a. Cash memo hi an ziak uluk lo hle nia maw le!
Tin, heti hi a ni a, dawr nghaktu nula chuan “A khaina ip in duh chuan cheng ngain lei tur kan nei nghal” a lo ti var a. Kei ve thung chuan “Mami, in tih tur a ni lo asin. Thil lei dahna(carry bag) man hi lak a ni ngai lo vairamah phei chuan consumer thubuai a tam thin asin. Ti reng reng suh u.. Miin an khing mai ang che u” ka ti mial mial mai a. Mami pawh chu a harh deuh huaiin ka hria.Mahse,Mizoho hi kan fin var loh em avangin lawm takin carry bag man kan lo pe zel a ni chek ang.Vai Dawr lian pakhat chuan carry bag man an lak zel thu ka dawng fo mai.
Eng pawh ni se, consumerte humhim nan hma kan la zel a.He article ka buatsaih lai pawh hian phone call ka dawng mawlh mawlh mai!
Electric ban sut thubuaite, Electric disconnection thuahte, motor lei chungchangte a nih hi! A va buaithlak tak em!
I thil lei leh hmannaah harsatna i tawk palh hlauh a nih chuan chiang fek fawkin sawi la, kan lo um zuisak ang che.