Aizawl: Health Minister Dr R Lalthangliana’n East tuipui bial chhunga khaw pathum – Vaphai, Samthang leh Khawbung khuate Inrinni khan a tlawh a, khawtlang hruaitute leh sorkar mi pawimawh te nen an inkawm.
An inkawmnaah Dr R Lalthangliana chuan, Covid-19 leng avangin hun eng emaw chen hmasawnna hna thawh a khaih lak a, dam khawchhuah theih nana thahnem ngai taka mipui, khawtlang, NGO leh kohhran ten sorkar an tawiawmnaah lawmthu a sawi a. Hripui leng avanga harsatna nasa tak an tawk chung pawhin sorkarin mipui hmakhua ngaia hmasawnna a theih ang anga a kalpui thu leh, a rah chhuahte hmuh chhoh zel a nih thu a sawi.
Dr R Lalthangliana hian World Bank fund Rs vbc 280 hmangin damdawi in chei that leh thuam that kawnga hmalak mek zel a nih thu te, Health Sub-Centre te Health & Wellness Centre-ah hlan kai zinga 34 velah Ayush Doctor dah a nih thu te, Sub-Centre awm lohna khua 235-ah health clinic-ah hmanraw mamawhte dah vek tum a nih thute a sawi bawk.
Health minister chuan JICA nena tangdunin Zemabawkah Rs nuai 70,000 senna tur Cancer Superspeciality Hospital din tum a nih thu leh, kum 2028-ah zawh fel hman beisei a nih thu a sawi a. Champhai district mipuite chhawr theih turin tun hnaiah Champhai Urban PHC, rikrum thila damlo enkawlna Trauma Centre, RT-PCR Laboratory leh naupang ICU te hawn a nih thu te a sawi a. Natna khirhkhan bikte uluk taka enkawlna damdawi in, khum 50 awmna tur Critical Care Block, Rs. nuai 2,000 senga sak tum a nih thute a sawi.
Health minister hi East Tuipui bialtu MLA Ramthanmawia, Vice Chairman, Bamboo Link Road Board, H&FW Department Principal Director Dr. PC Lalramliana, Director of Health Services Dr. Vanlalsawma, Mission Director NHM Dr. Eric Zomawia leh official dangten an tawiawm a ni.