Aizawl: Thla tin Pathianni hnuhnung bera Radio/Doordarshan kaltlanga Prime Minister Narendra Modi–a’n ram chhung mipuite hnena thuchah a sawi thin, ‘Mann Ki Baat’ vawi 100-na chu nimin khan ram chhunga Raj Bhavan zawng zawngah a huhova thlir leh ngaihthlak a ni a, Mizoramah pawh Larsap Hari Babu Kambhampati hovin sorkar mi pawimawh leh sawm bikten Raj Bhavan-ah an thlirin an ngaithlaho a ni.
Raj Bhavan-a prime minister thusawi ngaihthlaknaah hian hnathawh that avanga prime minister-in ‘Mann Ki Baat’ a an hming a lo lam rik tawh zinga Mizoram mi pahnih – Lok Sabha MP hlui, CL. Ruala leh Rochamliana te hnenah larsapin lawmpuina thilpek a hlan.
CL. Ruala chu MP a nih laia model village atana a thlan, Khawlailung hmasawnna tura a hnathawh that avang leh ‘Kurtai Kut’ a buatsaih chu prime minister-in ‘Mann Ki Baat’-ah a fak a. Rochamliana pawh ‘Save Chite Lui’ tia environment humhim kawnga a hmalakna avangin a fak bawk a ni.