Aizawl: Tuikum Bial Zirlai Pawl-in Inrinni khan MZP Conference Hall-ah general assembly an hmang a, hmanpuitu, Minister Er. Lalrinawma’n zirlaite chu nun uluka ruihhlo laka fihlim turin a chah.
Er Lalrinawma chuan zirlai kalkhawmte chu mahni inthunun thiam leh an thil tumah chiang chunga theihtawp chhuah tur te, an vela hnathawh tur awm apiang, a hniam emaw, a sang emaw thawk thiam turin a chah.
Tuikum bialtu MLA chuan bial a enkawlna kawngah zirlaite leh bial mipuite nen thawhhona tha tak an nei thin chu lawmawm a tih thu sawiin, hmasawnna hnathawhna kawngah thurawn leh rawtna a hnena thlen zel turin a sawm a ni.
Tuikum Bial Zirlai Pawl-in general assembly an hman hi an pawl Asst. Secy B. Lalrohlua’n a kaihruai a, an President Krosthanga’n thu a sawi a, chawhnu lamah hruaitu thar an thlang bawk.