Aizawl: Inrinni khan khawvel hmun dang rualin Mizoramah World Veterinary Day hman a ni.
A hmanna pui ber, Aizawlah chuan Indian Veterinary Association bultumin Tuma Resort Bung Bangla-ah hman a ni a, AH & Vety Minister Er Lalrinawma’n a hmanpui.
Vety Day hmannaah hian CVSc & AH, CAU Selesih-a asst. professor Dr C Lalmuanthanga chu resource person a ni a, Molecular Microbiology & Immunology School of Medicine, Oregon Health & Science University USA-a research titu Dr Jonathan Lalsiamthara Ralte chuan thu a sawi bawk.
World Veterinary Day hi kum tin April thla Inrinni hnuhnung bera hman thin a ni a. Kumin hi a vawi 23-na niin thupuiah ‘Promoting Diversity, Equity & Inclusiveness in the Veterinary Profession’ tih hman a ni. A awmzia chu, veterinary hnathawhnaah hian indaidanna thiah a, intluktlanna leh he hna in hma a sawn zel theih nan a funkim thei ang bera hna thawh hona lam a kawk a ni.
Kum 1863 khan Prof J Gamgee chuan Europe-a veterinary doctor-te chu kokhawmin inkhawmpui a neihpui a. Ran hriselna lam, a bikin ran leh ran atanga inkaichhawn theih natna chungchang (epizootic diseases) leh, chu’ng natna laka invenna tur lam sawi ho a ni. He conference hi khawvel pum huap ang pawha a hmasaber a ni. Kum 1959 khan 15th International Veterinary Congress meeting chu Spain-ah neih niin, World Veterinary Association (WVA) a lo piang ta a. WVA-in a tum ber chu, science thiamna pung chho zel behchhana veterinary hna (profession) dah pawimawh leh ran hriselna ngaihpawimawh te, ran enkawlna tihchangtlun te, him leh tha zawka ran vulh leh enkawl te, a tul dana ran dahhran (quarantine leh isolation) te leh a dangte a kawk a ni.
Kum 2000 atang khan khawvel pum huap angin World Veterinary Day hi hman tan a ni.