MPCC President Lalsawta’n MPCC Treasurer Zodintluanga Ralte-in MPCC Treasurer a nihna atanga banna a thehluh chu pawmsak a nih thu leh a aiawh tur chu party hruaitu ten an la ngaihtuah tur thu a sawi.
Vawiin khan MPCC elected OB ten thuthar thehdarhtute an kawmnaah he thu hi MPCC President chuan a sawi a. Zodintluanga’n an party Treasurer nihna atanga banna a thehluh hnuah an party-a senior te thurawn angin an in-ah Zodintluanga nen an inkawm thu sawiin, inpawh taka thil awmzia an sawi dun hnuah ui tak chungin Zodintluanga’n MPCC Treasurer atanga banna a thehluh chu pawm turin thutlukna an siam ta niin a sawi.
MPCC President chuan party-a thawhhonaah ngaihdan inan loh chang leh inlungrual loh chang te awm mahse, dawhthei taka inhriatthiam tlan zel a tul thu a sawi a. Zodintluanga nen pawh ngaihdan inpersan an lo nei a nih pawhin mimala inhuatna an neih loh thu sawiin, MPCC Treasurer ni tawh lo mahse, Congress party thatna turah chuan theihtawp chhuah inhuam reng a nih thu a sawi bawk.
Tarlan tawh angin Zodintluanga chuan April ni 21, 2023 khan MPCC Treasurer a nihna atanga banna a thehlut a. Hetih lai hi MPCC President zin bo lai a nih avangin hemi chungchangah hian thutlukna pawh an siam tlai ta deuh niin MPCC President chuan a sawi. Vawiina MPCC elected OB ten thutthar thehdarhtute an kawmnaah hian Treasurer atanga bang ta Zodintluanga Ralte pawh a tel a ni.