Khartoum khawpuiah hian mi tam takin ei leh in tur an tlachham tawh a, Thawhtanni khan World Food Programme chuan an hna an chhunzawm leh tan tih an sawi a, chawlhkar hnih liam taah khan buaina chhuakah an hnuaia thawk mi pathum thah an nih avangin an hna an chawlhsan tih an lo puang tawh a ni.
Sudan-ah hian ram dang atanga puihna a thleng tan ta bawk a. Pathianni khan a phurtu thlawhna hmasa ber a tum lut a, hetah hian damdawi lam thil a tam deuh ber.
International Committee of the Red Cross (ICRC) chuan an thlawhna tirh hi Port Sudan-ah tumin puihna thil chi hrang hrang tonne riat a phur tih an sawi a, heng zingah hian damdawi ina hman tur bungrua a tel tih an sawi.
“Inbeihna a la nasat em em karah ICRC hian lehlam lehlam atangin himna an mamawh a, heng bungruate hi indona thlen mekna hmuna dah a ngai dawn a, heng zingah hian Khartoum pawh a tel a ni,” tiin thuchhuah an siam.
April 15 atanga indona a chhuah hnuah khan khawpui berah hian damdawi in 70% chu khar ngaiin a awm tawh a ni.
Sudan atang hian ram dangte chuan an mite an hruai haw mek zel bawk.
UK chuan Pathianni khan Thawhtanniah British mite hruai hawin thlawhna a thlawk tan dawn tih a puang a. US pawhin Jeddah, Saudi Arabia panin an mite an hruai haw tan bawk.