Aizawl: ZPM leader Lalduhoma’n District Institute of Education & Training (DIET)-a thawk Group A leh B-ten hlawh an lak theih loh avangin nimin atang khan hna an thawk lo nia sawiin, pawi a tih thu a sawi.
Nimina ZPM party chhung inkhawmah he thu hi Lalduhoma chuan a sawi a. DIET-a thawkten hlawh an lak theih loh avanga hna an chawlhsan lailawk chuan zirna lamah nasa taka nghawng a neih tur thu sawiin, “Sorkar hian a rang thei ang berin an harsatna hi ching fel rawh se,” a ti.
ZPM leader chuan tun hnaia an party-in kumina MLA inthlan inbuatsaihna atana bial viltu an ruat chungchang sawifiahin, search committee-in bial viltu tur rei tak an thlithlai tawh thu a sawi a. Nikum November khan an party OB-in search committee chu bial viltu tur ruat theihna pek an rawt a, zau taka an inrawnkhawm hnuah pawm a nih thu leh committee chu nomination committee atan pawh lungrual taka an pawm thu a sawi.
“Meeting hrang hrang kan neihah a tam zawk duh danin thutlukna kan siam mai lo va, kan zavaia duh tlan, 100% hlirin thutlukna kan la siam a ni,” Lalduhoma chuan a ti a. “Kan mite hian sorkarna siam loh an hlau tawh a, tlin ngei an duh ve tawh avangin candidate ruat chungchangah pawh ngaihdan hrang hrang a awm phah lo thei lo,” a ti.
ZPM-ah mi thiam leh mi tha tak tak an luh reng avangin bial insem chungchangah pawh harsatna pawh an tawk lo thei lo nia sawiin Lalduhoma chuan, “An lo la luh belh zel dawn a, ZPM hian party tichaktu tur, kaihruaitu tur mi thiam leh mi inpe, ram hmangaihtu a mamawh reng a ni, mi mal tan kan ding lo va, kan ram tan policy-ah kan ding reng dawn a ni,” a ti bawk.