Formula 1 a constructors’ champion ni lai Red Bull Racing in car tha an neih lantir lehin Baku kawtthlerah intlansiak an thunun nawn leh. Nimahsela tun tumah an driver langsar Max Verstappen ni lovin a teammate Sergio Perez zawkin Azerbaijan Grand Prix-ah hnehna a chang.
Baku City Circuit-ah Perez-a’n tihsual langsar nei lovin intlansiak a tlan zova. A teammate nen hian han inum deuh thin mahse Dutch driver world champion ni lai hian tun Pathianni tlai intlansiakah a pha hleithei lo. Mexican driver in safety car chhuah lai remchang a lak chu a chakpui.
Chiang zawkin
Tun season-ah round thum tlan a ni tawh a, thil pakhat a chiang – Red Bull car a tlanchak fal.
Qualifying-ah Ferrari in ‘upgrade’ thar an hman chuan awmzia a nei tih langin Zirtawpni leh Inrinni-ah tlan chak viau mahse intlansiak pangngaiah erawh Red Bull tho an chungnung.
Pahnihna atanga tlan tan Verstappen-a’n pakhatna atanga bul tan Charles Leclerc chu lap 3-naah a pel a, pathumna a awm Perez pawhin a pel ve thuai.
Intlansiaka pawimawh lai erawh lap 11-naah a thleng. Nyck de Vries-a Alpha Tauri car a thi a, lakchhuah a ngai. Hei vang hian safety car tirh luh a ni.
Verstappen-a’n he thil thlen lai vel chiah hian a car ke a thlak a, safety car chhuah hnuah tlanchak theih a nih loh avangin a elpuite zawngin hun seng rei lo zawkin car ke an thlak vek. A hma hruaina chu hloh phahin a tawp thleng a la kir leh tawh lo.
Midang?
Ferrari in car part thar an thatpui. An driver Leclerc-a’n qualifying tlan thiam ber tia an chhal thin chhan a lantir. Qualifying leh sprint shootout-ah a tlan chak ber. Intlansiak pangngaiah erawh Red Bull tlanchak theihna chu an la pha lo.
World champion vawi hnih ni tawh Fernando Alonso leh Ferrari te an inel viau dawn niin a lang tan. Hetihlaiin Mercedes team an la awm. Hmasawnna nei mahse tun kartawpah erawh a tlanchak pathum zingah an tel lo.
