Aizawl : PC party President Vanlalruata’n “sorkarin ṭan a lâk duh chuan tui kan harsa lo thei” a ti.
Vanlalruata chuan nimin khan Tanhril, Mualkhang rama SIPMIU hmalakna – Aizawl khawpui chawmna tura tui làkna tur – 37MLD Water treatment plant for augmentation of Aizawl water supply tlawhin, “Mizoram sorkarin mipui tana hma a la tak tak duh a nih chuan tun ṭhalah hian Aizawl khawpuiin tui harsatna a tawk lo thei” a ti a. “Mipui tana harsatna awmlo tura hma la tur erawh chuan sorkarin huaisen leh chak taka hma a lak a ngai” a ti.
Aizawl khawpui tua chawmna tura SIPMIU hmalakna hi hna zawh thawkhat a nih tawh thu leh khawl te pawh hman theih tura tuaihnuma enfiah mek a nih thu PC President chuan a sawi a. Hunthar Veng-a leitlahniam bawrah pipeline meter 100 vel siam zawh loh a la awm thu leh tui pump-na tur hmunah electric line la thlunluh fel loh a nih thu sawiin, hmabak la awm te hi hmanraw awm sa vek tawh a nih avangin sorkarin huaisen leh chak taka hma a lâk chuan hun rei lo te chhûnga siam zawh mai theih tur niin a sawi bawk.