Mizo musician lar leh hriathlawh tak, Albatross band keyboardist ni bawk PB LIanhmingthanga chu nimin nilai zing dar 4:25 khan a boral a, chawhnu dar 1:00 ah vui liam a ni.
A thih thu hian Zo rimawi khawvel nasa takin a barakhaih a, uitu a ngahin, sunna thu leh hla tam takin a umzui nghal. Music music industry tan channa nasa tak a tling a, a hmunruak luah a huphurhawm hle ang. PB Lianhminga hian a nupui Lalnunpuii leh a fate pathum bakah tu pali a kalsan.
TUNGE A NIH?
Amah hi talent nei tha tak a ni a. Badminton, Volleyball leh Football-ah te hian enizawnna tlakin talent a nei tha a ni. Dawrpui vengthar aiawhin heng sports inelnaah te hian a tel tamin, vengin lawmman a dawn tam takah pawh hian a thawhhlawk hle a ni. Hemi bakah hian Mizoram aiawhin vawi duai lo a lo fehchhuak ve tawh bawk.
Music lamah hian talent a nei tha em em a, a eizawnna ber a ni ta reng a. Music musician lar berte zingami a ni a, mi hriat hlawh tak niin, Mizoram zaimi lar tak takte bul lo tanpuitu niin music track lo siamsak thintu a ni. Studio lar tak VEGA leh Zozam studio-ah te hun rei tak a lo thawk tawh thin a ni. Heng bakah hian zaithiam harsa tak takte leh khawlaia mitdel zai thin te chenin an track mamawh te a thlawnin a lo siamsak fo thin a ni.
Tunah hian Mizoram band lar tak Albatross-ah keyboardist a ni mek a, heng bakah hian band hrang hrangah keyboard tum tura pawh lawr thin a ni. Intihsiakna hrang hrangah te lawmman te pawh engemawzat a lo dawng tawh. Hla pawh engemaw zat phuah ve in, a hla phuah zingah, ‘I ropui nan’ tih pawh mawi takin Albatross in an sa a hemi bakah hian Mizo zaithiam lar tak, Hlutein ‘I lainatna’ tih hla a phuah chu thiam takin a sa bawk.
A NAT TAN DAN
Kum 2019 vel atang khan insawiselna nei tanin, Damdawi In ah pawh vawi tam inekawlin a awm a. Hun engemawchen In lamah inenkawl chhovin, a natna hian damlam a pan theih meuh loh vangin kumin 2023 kumtir lamah Damdawi In lamah dahluh a ni leh a, hmasan lam pan thei meuh loin In lam leh Damdawi in lam a kar tawh reng a. Beiseina sang tak nei chungin Damdawi In ah in dahluh leh na a, a natna hi a lo nasat tawh em vangin a tlin ta lo a ni. Nimin zing dar 4:25 khan a lei zinkawng a zawh tawp ta.