Serbia-a sikul pakhata inpawng kahna thlengah naupang pariat leh security guard an thi a, hetiang hi he ramah hian a thleng khât hle niin thuneituten an sawi.
A kaptu nia an puh hi naupang kum 14 mi, pawl sarih zirlai a ni.
Belgrade lailia police chuan Vladislav Ribnikar sikula inkahna a thlen thu hi Nilaini zing dar 8:40 (India-a chhun dar 12:10) hnuah an dawng tih an thuchhuahah an sawi.
A kaptu rawlthar hian a pa silaiin a zirlaipui leh an school guard chu a kap chiam a ni.
Zirlai hliam tuar paruk zinga pakhat chu a na hle a, zai nghal a ni a, zirtirtu pakhatin hliam na vak lo a tuar bawk.
Vracar district Mayor Milan Nedeljkovic chuan zirtirtu nunna chhan tumin doctor-ten theihtawp an chhuah tih a sawi.
Inkahna a thleng tih a darh hnuah hian nu leh pate chuan chiai takin an fate ngaihvenin sikul an pan khawm nghal.
Inkahna a thlen laia history class-a a fanu dahtu, Milan Milosevic-a chuan a hriat veleh rang takin a tlan chhuak nghal tih N1 television hnenah a sawi.
“Ka thlen chuan, ‘Khawiah ngei ka fanu?’ tiin ka zawt nghal a; mahse, tumah min chhang an awm lo,” a ti a. “An han koh chuan a lo chhuak ta hlauh a ni,” a ti.
“A kaptu hian zirtirtu a kap phawt a, chumi hnuah naupangte chu a kap leh a, dawhkan hnuaiah an tawm vek,” tiin Milosevic-a hian a fanu sawi a sawi chhawng a. “Mipa naupang ngawichawi tak, nungchang tha tak niin a sawi,” a ti bawk.
Helmet leh silai kah thlang theih loh nena inthiam officer-ten sikul hi tlawhpawh theih rih loh turin an khar nghal.
“Naupangte chu te teng tung chungin an tlan chhuak ka hmu,” tiin a bul lawk high school-a kai, Vladislav Ribnikar-i chuan TV RTS a hrilh a. “Nu leh pa an lo thleng a, an chiai hle a, silai hi vawi thum puak ka hria a ni,” a ti.
Tual chhung chanchinbute chuan police-in a kaptua an puh an hruai hrang lai video an tilang a, a lu an khuhsak tlat a, officer-ten kawtthlera car hunnaah an hruai a ni.
Serbia-ah hian inpawng kahna hi a thleng khât hle a, silai khuahkhirhna dan an nei khauh hle bawk a. Mahse, Balkans khawthlang ram hian indona leh kum 1990 chhova buaina a tawh hnuah dan lova silai kawl an tam hle.
Inpawng kahna thlen hnuhnung ber chu kum 2013 kha niin Balkan war veteran-in ram lailia thingtlang khuaah mi 13 a kap hlum.