Rwanda khawthlang lama ruah nasa tak sura tui lian avanga thi chu mi 95 vel an tling tawh.
Western Province Governor François Habitegeko chuan thi zat hi an chian tawh thu Nilaini khan a sawi tih Reuters news agency chuan a tar lang.
“Zankhuain ruah a sur a, Ngororero, Rubavu, Nyabihu, Rutsiro leh Karongi district-ah chhiatna a thleng nasa hle,” a ti.
An province-a tuar na ber chu Rutsiro district niin mi 26 an thi a, Nyabihu-ah mi 19 leh Rubavu leh Ngororero-ah mi 18 ve ve an thi tih a sawi bawk.
Habitegeko chuan ruah hi an ram sanaa Thawhlehni tlai dar 6:00 (India-a zan dar 9:30) pelh hret atanga surin River Sebeya tui chu a luang liam nasa hle tih a sawi a. “A hmaa ruah lo sur tawh avangin lei a lo nem tawh bawk si a, lei a min nasain kawng ping pawh a tam hle,” a ti.
Rwanda Broadcasting Agency-in Twitter-a video an dahah pawh in leh kawng chhe karah tui leh chirh inpawlh chak taka luang a lang.
Rwanda Meteorology Agency chuan African khawchhak lam ram hian May thla hian a nih dan thin pangngai aia tam ruah an dawng dawn niin a lo sawi lawk tawh.