April 15 atanga Sudan-a sipai chi hnihte indona nasa tak avangin mi 1,00,000 chuangin an ram an tlanchhiatsan tawh niin UN-in a sawi.
Thuneitute chuan indona hi a tawp mai lo a nih chuan ‘chhiatna rapthlak tak’ a thleng dawn niin an sawi.
Ram chhuahsana raltlan bakah hian Sudan ram chhungah mi 3,34,000 vel awmna mumal nei lovin an awm phah mek bawk.
Indona hi an khawpui, Khartoum-ah nasa taka chhuakin army leh paramilitary Rapid Support Forces (RSF) an inbei a, inkahhai puang mah se awmzia a awm lo.
Palai hna thawka indona tihtawp tuma hma lak mek a nih bakah inbei mek pahnihte hi dawhkan kila inbe tura nawrna a nasa hle.
Thawhlehni khan South Sudan foreign ministry chuan army leh RSF hian May 4 atanga tan turin ‘a thuphungin’ inrintawnna siam an remti a, an aiawh ve ve inbiak an remti bawk tih a puang.
Hemi hma ni chiah hian UN special envoy to Sudan, Volker Perthes chuan AP news agency hnenah lehlam lehlam hian ‘inkahhai rintlak leh a nghet tur’ siam tura inbiak an inpeih tih a lo sawi tawh.
Saudi Arabia chu inbiakna tur hmun remchang hnai ber a nih thu a sawi bawk.
An inbia a nih chuan buaina a chhuah hnua pawl hnih an inbiakna hmasa ber tur a ni ang.
Sudan health ministry chuan indonaah hian mi 500 chuang thi awm tawhin mi 4,000 chuangin hliam an tuar bawk niin an sawi.
Inkahhai puan a lo ni tawh thin a; mahse, a hlawhchham zel a, army chuan Khartoum-a RSF awmte chu chhut chimih tumin thlawhna hmangin an bei reng tho.
Paramilitary hian khawpui chungah MiG fighter jet an kap thla niin an insawi a; mahse, anmahni sawi bakh finfiahna a awm lo.
Khawthlang lamah Darfur-ah pawh inbeihna a nasa hle bawk.