Nimin chawhnu khan Keifang bulah Bolero Camper MZ01 Y – 0201 chu kawng thlangah a tlan liam a, a chhunga chuang mi pahnih an thi.
Thudawn danin Bolero Camper hi Aizawl atanga Changzawl pan a ni a, Tuirini chhak, Keifang atanga km 16-17 inkarah kawng thlangah tlan liamin metre 150 vel a lum a. Bolero-ah hian mi pathum chuangin an zinga mi pahnih – motor neitu, C.Raltawnluia (65) leh Chawnglianthuama (62) te chu hmunah an thi nghal a, driver Ramnghakmawia (29) chuan hliam na tak a tuar a, an pathum hian Changzawl khua vek an ni. Pick Up hi Aizawla dawr bungraw la haw lam niin a hmaa sumo tlan pelh a tum chu a chesual ta mai nia hriat a ni.
Chetsualna a thleng tih hriat a nih veleh Saitual Police, Sub.Hqrs YMA, Quick Response Team (QRT) Saitual district, Keifang Jt VC leh mi tlawmngai thahnem takin a hmun an pan nghal a, a hmun hi kham a nih avangin chhanchhuah hna thawh zung zung a harsa hle a, QRT-te an hmanrua nen khamah hian lut thlain hliam leh mitthite hi lak chhuah an ni.
Dr.L.Thangmawia a bial fang tura thawk chhuak chuan Seling a thlenin chetsualna a thlen thu hriain chetsualna hmun hi a pan nghal a, ruang hi District Hospital-ah zuiin tul leh buaipui ngai apiang a buaipuisak nghal a ni.
Lirthei chetsualnaah thite hi nimin tlai khan post mortem niin nimin vek khan an khua, Chawngzawl panpui nghal an ni.