Delhi chuan Ningani tuk khan chhum leivak nasa taka zing a tawng a, tun ang hunah hetiang hi a thleng khât hle.
May thla hi ram khawpui berah hian kum khat chhunga a lum ber thla a ni thin a, 39.5°C vel a ni thin.
Ningani tukah erawh 15.8°C chauh niin kum 1901 hnu lama May thlaa a vawh ber tuk pathumna a ni phak hial.
Delhi hian May thlaah hian chhum zing, ruah leh khaw vawt deuh an beisei a, hei hi khawthlang lam atanga thli vawt tleh mek zel vang niin mi thiamte chuan an sawi.
Mi chengte chuan social media-ah zingkara chhum zing phui chuk chu a video leh thlalak an tar lang nasa hle.
“May thla zingkarah chhum zing. Kum 40 chuang hetiang hi ka hmu ngai tawh lo, a tak ngei chu a ni si,” tiin mi pakhat chuan Twitter-ah a tar lang.
“Nipui laiin zingah Delhi-ah chhum leivak! Nikum tun ang hunah kha chuan khaw lum uchuak kan tawng si!” tiin mi dangin a ti bawk.
Weather department thuneitute chuan boruak a hnawng a, thlifim a thaw reng a, zan leh chhuna khaw lum lam inthlak nasa thin bawk avangin chhum leivak zin theihna chance a sang niin an sawi.
IMD chuan chhum leivak zing avang hian khaw hmuh theih chin chu metre 501 leh 1,000 inkar vel niin an sawi.
Safdarjung Observatory chuan Nilaini zing dar 8:30 leh Ningani zing dar 8:30 inkarah ruah mm 30 a tla niin a sawi bawk.
Khaw lum lai berin 30.6°C niin a nih dan thin pangngai aiin 9°C zetin a hniam zawk a, a vawh lai berin 15.8°C chauh niin kum 1901 atanga chhinchhiah tawh chinah May thlaa a vawh ber pathumna a ni.
May thlaa a vawh ber tum chu May 2, 1969 kha niin 15.1°C a ni a. May 2, 1982 khan 15.2°C a lo ni tawh bawk.
Delhi-ah hian April-ah ruah mm 20 chuang surin 2017 hnua April-a a sur tam ber tum a ni bawk.