Zoram People’s Movement (ZPM) chuan nimin khan Manipur tualchhung buaina chungchangah Zohnahthlakte himna tura hma la thuai turin chief minister Zoramthanga hnenah ngenna ziakin an thlen.
An lehkha theh luhah hian ZPM chuan, tunlai Manipur tualchhung buaina avanga Zohnahthlak ten manganna leh harsatna nasa tak an tawh mek bakah nunna hial changte an lo awm tak avangin pawi an tih thu leh he thil thleng hi chi leh chi inkar buaina a nih avangin a ngaihpawimawh a ngaih thu an tar lang.
ZPM chuan, “He buaina hian eng nge a thlen dawn hriat a nih loh avangin Zohnahthlakte himna a rang thei ang bera ngaihtuah tur leh hmun hlauhawm zuala awm mek te phei chu hmun him zawka thiarchhuak turin ZPM chuan a ngen tak meuh che a ni,” tiin an tar lang.
He buaina hi chinfel thuai a nih theih nan te, tlang mite himna leh an chanvo humhim a nih theih nan te a tul anga Manipur Chief Minister leh Union Home Minister te nena hma la thuai turin an ngen a. Manipur-a Zohnahthlakte himna leh an chanvo humhim a nih theihna atana Mizoram sorkar hmalaknate an thlawp thu leh a tul hunah an chechhuak thei reng a ni tih an tar lang bawk.