Inthlan kum hi chu politician te zaidam leh that chhuah kum a ni an ti thin. Inthlan pui kum danga an tih thin danin mipui vote lak theihna kawng hrang hrang an rawn dap leh dawn a. A thenin mitthi buaipuiin ruang phurh, mitthi ral; Aizawl atanga an khaw lama ruang phurhna tur motor ngaihtuah sak a ni ang. Ruang phurhna tur motor te chu a rawn thleng leh zut zut ang. A thenin damlo kan tur a zawnin an rawn zawng leh dawn a. Damlo kan tur list chu an note bu teah an chhinchhiah thlap thlap ang. A then chu kan chhungte an rawn ni thar leh dawn a ni.
Sum pawh an rawn ren lo leh hle dawn a. Kan khaw lama kan hawna tur sumo chuan man han inpek mai kha an sam em em dawn a. Nidanga mi tanpui ngai lo pawhin rang takin pawisa an rawn phawrh dawn. Sum hmachhuana kan mamawh hre thei em em an rawn pung leh dawn a. Sawhthing hralhna hre deuhte, dragon fruit market hre em em maite pawh an tam hle dawn a ni.
Mizote hi mi rilru no/nem tak mai kan ni a. Heng thilin a sutthluk avanga politician nikhua lo deuh te lo hmu tuitang ta riau maite hi kan awm leh teuh thin. Heng hi bumna thang hlir a ni tih mipuiin kan hriat a pawimawh ta takzet a ni.
Kan ram roreltu tur kan thlang dawn a. Mitthi buaipui turte, damlo kan turte, sumo fare min pe mai turte ni lovin, kan ram rorelna a kan aiawha mipui hmasawnna chungchangte ngaihtuah a, kan ram leh hnam hi a him leh him lohte, kan kawngte chu changkang zawk leh tlan nuam zawka siam turte, electric eng kan neih that leh that lohte, education system tha zawka kan faten lehkha an zir theihna turte rel tur kan thlang dawn a. Roreltu tur thlang tur kan nih avangin mipui hian kan duh fir hle a ngai tawh. Kan aiawh turte hi kan zirchian a, a hun kaltawhah eng mi nge a nih tih thlenga kan bihchian a ngai. Kan kohhran upa a ni tihte, kan KTP mi leh sa a ni tih vel vanga vote kan inpek pawh hi sim a hun tak zet.
Ram leh hnam hmangaihtu, mahni eizawnna lam aia ram dah pawimawh thin, a lang apaua tha ngawt ni lo i dap hram hram ang u. Kan MLA tur chu enthuak nil ovin, en chet chet i ching ang u khai.