Chief Minister Zoramthanga chuan a Instagram-ah nimin zing khan a pisaah Central YMA hruaitute nen Manipur tual chhung buaina chungchangah an inkawm thu tar langin, “Tun hnaia Zofate leh India hmarchhak mipuite tan remna leh muanna a awm theih nan theihtawp chhuah zel kan tum,” a ti.
Union Home Minister Amit Shah nen rei tak an inbiak thu chief minister hian tar langin, “Pawisawilo leh nunau tam tak ten harsatna an tawk hi pawi kan ti tak zet,” tiin, theihtawpa remna leh muanna a awm theihna turin Central Armed Police Force-te pawh dah belh a tum thu union home minister hian a hrilh niin a tar lang.
Nimin zing vek khan Manipur Chief Minister N Biren Singh nen pawh telephone-in rei tak an inbiak thu a tar lang bawk a. “Manipur dinhmun leh an buaina chungchang chin fel a nih theih dan tur chungchangte kan sawi dun a ni. Manipur CM pawhin hmarchhak CM-te zinga upa ber chan chang ka nih ve avangin remna a awm theihna tura hma la tur pawhin min beisei hle bawk,” a ti a; an inbiakna hian rah tha a chhuah ngei a beisei thu leh pawisawi lo leh nunaute him taka an awm theihna turin joint press statement siam an tum thu a tar lang bawk.
Chief minister hian Mizoram sorkar pawhin he buaina hi a en liam mai mai dawn loh thu leh home minister bakah home commissioner kaihhruaina hnuaiah eng dinhmun pawh thleng se, an mi leh sate himna tura hma an lak dan turte lo inenlawkna meeting nei turin a hriattir tawh bawk ti a sawi.