Aizawl: Congress Legislature Party (CLP) Leader Zodintluanga Ralte chuan Chakma Autonomous District Council (CADC) area inthlanah tun tum anga buaina chhuak tam leh muanawm lo a la tawng ngai lo tih sawiin, bial tinah inthlanna muanawm neih a nih theih nan venhimna uluk zawk pe turin MNF sorkar a phut.
Ningani khan Zodintluanga hian CADC inthlan lo awm tura inbuatsaih nan Chawngte leh Borapansury inkar khaw hrang hrangte a tlawh a, nimin khan Borapansury leh Longpuighat inkar khua 17 a tlawh leh a ni.
Chotopansury khuaa party mite hmaah thu sawiin Zodintluanga chuan, CADC inthlan lo awm tura 15 Rengkashya biala BJP candidate Amit Kumar Chakma-in mi kut tuara nunna a chan chu pawi a tih thu sawiin, “Kum 35 chhungin CADC area-a inthlannaah vawi tam tak kan kal tawh a, tun tum anga buaina chhuak tam leh muanawm lo lutuk hi kan la tawng ngai lo,” a ti.
“Tun tuma BJP leh MNF ten hetiang em ema inthlan an tiralmuang lo leh candidate-in nunna an chân hial bakah hliam tuar tam tak an awm hi thil pawi leh zahthlak tak a ni,” a ti a. CADC huam chhunga bial tin ten thlamuang leh him taka inthlan an hmachhawn theihna turin venhimna tha zawk siam turin MNF sorkar a ngen.
Zodintluanga chuan tun tum CADC inthlang turah hian Congress party chuan thalai lehkhathiam, chapo leh rilru kawi lo fel leh viak tha tak tak candidate an nei chu lawmawm a tih thu a sawi a. Thalai lehkhathiamte hian CADC-a eirukna nasa leh hmasawnna hmel hmuh tur awm lo hi an thian fai dawn a, he an hmabak an hlen theihna tur hian Congress party candidate-te vote tling vek turin party leh CADC area mipuite a sawm.
Thawhlehah CADC-a MDC bial 20-ah inthlan a ni dawn a, May 11-ah vote chhiar a ni ang.