- Lallunghnema, Charity Lodge
Tun hnai a ka article te kha thahnemngai takin in lo chhiar thin a, ka lehkhabu consumer te pual a ka ziah pawh lo chhiar pawl in awm zel bawk a ni.Ka message dawn pakhat hi,”Ka pu,tunah hian i lehkhabu ziah ,’Consumerte Thian,’ka lo chhiar a.A ngaihnawmin a bengvarthlak ka ti hle mai”, tiin. Keini ang, a hming mai a B.A (Hons ) zo ve ngawr ngawr te hi mi puitling tak kan ni lova.Nep the the tak ka ni! Mahse, ka’n ti ngawt teh ang,ka theihna tlem hle mahse, consumerte tan hian ka inhlan ve tawp mai a.Min pan a min pun tute chu ka ti thlawn ngai lo viau mai.
Ka thiam ang tawkin ka titipui thin a,ka lo fin chhuah chang a awm. Min pantu,ka tihhi phone leh WhatsApp kal tlanga an harsatna min hrilhtute an ni. Ka hmel hriat pawh ni hauh lote ka lo phurpui viau thin hi ka lawmna a ni .Hlawh leh lawmman ka beisei lova.Hei hi ka lawmna ti zualtu a ni a.Insawi theiah min lo ngai lo hram turin chhiartute ka duh che u a ni.
Hetiang ang service-a ka tui ta tlat mai hi mak pawh ka inti khawp mai.Kei ve hian Pathian min pek a nih hi ka ti hial a ni.Thil leitu a thil leia harsatna tawk chu ngawi liam mai mai suh se.
Nula pakhat fel leh kawm nuam tak hi a awm a, chu nula chuan thil chhete ka tih sak avangin pawisa min pek a tum a, ka duh lova, ka la ta lo. Thingpui erawh ka insak. Hetiang mi hi an tha, lawmthu sawi nachang hria hi! Hetiang mi hi puih an chakawm thin! Lawmthu sawi hi khawvel ti nuamtu a ni a, chhungkaw tihlimtu a ni.
Kan Pathian thu pawh hian, lawmthu sawi hi a ngai pawimawh em em si a ni. Mahse, inthamna ang zia zang a thil intihsak hma a thil inpek erawh a tha hauh lo! Lawmthu sawina atana pawisa pekte, thil pek hrim hrim hian tawpna duhawm lo a hring duh fu an ti!
Ka article hnuhnung berah khan thil tih khawtlai (delay in service) hi consumer right bawhchhiatna a nih thu ka sawi a. Kha mi avanga thubuai remna ka rawn tarlang a nih kha.
Consumer Right hian a huam zau em em a. Thil leiah chauh ni lovin service hi a huam deuh vek a ni. Mahse consumer act thlirna tukverh atang erawh chuan ‘a thlawn’, a lei leh hmanna a nih hrim chuan thil leitu leh hmangtu nimahse, a dikna leh chanvote chu court-ah a cho let thei lo a ni. Hralh leh chhawn tur, pei pun tur anga thil lei hi pawisa senna pawh ni se, thil leitu chu consumer a ni thei chuang si lo a ni.
Tun tuma kan thupui ve thung hi chu thil siam kum leh ni tarlan dik loh thubuai (misrepresenting manufacturing date) a ni a. Sap tawngin ka’n dah leh mai teh ang.Lunglei khawpui a awm mek,ka nau ,Consumerte right vei em em Pu V.Lalnunmawia te khan lo hre thiam mai teh u.
‘National Consumer Dispute Redressal Commission Directs Porsche to pay 10 lakh compensation with interest to customer(consumer) for misrepresenting manufacturing year’
Hetiang hian sawi chhunzawm zel a ni.
‘The Commission held that the act of Porsche Centre misrepresenting the manufactured in 2013 as 2014 ( helai hi a pawimawh lai tak a ni-llh ) will lead to unfair trade practice and deficiency in service’.
Motor Car siam kum 2013 a nih lai a kum 2014 a siam anga lo sawi ngawt te, lo inhrilh ringawtte, lo ziah ve ngawt te hi Consumer Protection Act, 2019 chuan a remti hauh lo a, dan bawhchhiatna a ti a ni.Chutiang tak a dawt sawi chu sum fai tam tak Consumer Commission chuan he company hi a chawitir ta hmiah mai a ni.
Porsche Centre( Company leh Centre) hi kan sawi pawlh thin a. Thuhmun reng a ni tih lo hre mawlh teh u) hi Gurgaon, India rama, car siamtu lian an ni a. Car pawh an hralh chak hle a ni awm e. Chutih lai chuan a ai a hlawk beiseiin kum 2013 a an car siam chhuahte chu 2014 a siam anga ziah(print) an lo ching ta a. Kum khat aia hma a an car siam kum an tihdanglam khan an car chu an hralh chak phah leh zual an beisei a ni. Mahse, chutiang a dawt sawi chu Consumer danin a rem ti hauh lo mai a. Hetiang thil hi complainant Praveen Kumar Mittal-a chungah a lo thleng ta a ni.
Praveen Kumar-a hian Porsche motor car siam chhuah chu nuai 80 man zet a lei a. (Nuai 8 ni awm tak a ni, mahse 80 tih a inziak tlat si a-llha)
He car siam kum hi 2014-tiin ziak a ni. Mahse car leitu hian a han enchian chuan car siam kum dik tak chu kum 2013 a lo ni a. He Centre hian an car leitu te hi an bum tihna a ni.
Praveen Kumar-a chuan a lungawi loh thu Consumer Commission hnena thlenin he Commission hmaah hian Porsche chu khingin thiam a chang a ni. He vaipa hi a huaisen hle a, entawntlak tak a ni.
Source : Indian Legal News
Mizoramah hian consumer-te bum hmang, dawrkai an tam hle! Thil siam kum tihdanglam bakah thil man phuah chawp an ching hle. Hengho hi kristian tha inti ho an ni a.
Rate phuahchawp hmanga service thin Taxi pute leh Maxi cab khalh a passengerte bum hmangho ,thlawhtheihna company tam tak air ticket refund duh lote,ration buhfai sem tha duh lo retailerte, nen ang khat reng an ni.