A zoram dung leh vang nghawrchhuak thei, Zo rimawi khawvela langsar ber zingami leh Mizo mipa zaithiam zinga ‘Aw thâm nalh ber’ an tih hial, Joseph Zaihmingthanga chuan nimin chawhnu dar 1:20 vel khan a lei zinkawng zawh tawp in, A fate tan a hlaphuah a, “In tan ka awm reng ang,” titu hian a fate pahnih a kalsan ta a, an tan vanpui a chim nawn awn awn ngei ang.
A thih thu hian a chhung te, thiantha te bakah amah duhsak a, ngainatu fan tam takte hrilhhai takin a siam.
Joseph Zaia hi nimn chawhma lam a inkhawm bang chu In lamah a thu hah chawl a, room lamah kalin a tawngtai hnu ah thawm ri deuh thut hria in, an awmpui nula chu tlan lut nghalin, LRM Damdawi In panpui a ni a, mahse chhan theih a ni tawh lo.
Ramlun North venga khawsa Joseph Zaia hian fapa pahnih a kalsan a, report tarlan danin, a fapa upa zawk hi Naupang chawhnu inkhawm ah zai hruaitu a nih vangin ngaihthat lohna engmah nei loin Biak in lam panin a kal a, a zai hruai lai chu a pa thih thu hrilh tura kohchhuah niin, chanchin duhawm loh tak chuan a fate pahnih kum 16 mi leh kum 11 mi chu a deng zui ta a ni.
Joseph Zaia thihchhan dik tak hi sawi chian chiah la awm lo mah se, heart attack nia sawi a ni a. Instagram-a follower 57.6k neitu ni bawk hian nimin piah khan post hnuhnung ber siamin, ‘Manipur Biakin halnaah Bible a kang ve mang tlat lo…LALPA ropui rawhse Amen’ tih a ziak.
A boral thu hian Zoram khawvel a dengchhuak rang hle a, social media luahlumtu langsar tak ni chho nghalin, thlahna hnuhnung leu thu luangkuai tak tak chhiar leh hmuh tur a tam.
Super Trio-a thiantha Robert Lalduhzuala chuan a ruang buaipui lai thlalak dahchhuakin, “Kan Unaupa Joseph zaihmingthanga’n min kalsa/.Chawhma pawh ala inkhawm a, inkhawm bang kha room ah a tawngtai a, tichuan a tlu ri an hria a… nikhua alo hre lova… hospital pan pui nghal a ni a, dar 1:20 khan LRM hospital phurhthlen a ni a, mahse awmzia a lo awm toh lo a ni..Ava mak vee Zai….” a ti. Sailova pawhin FB profile ‘black’ dahin, ‘Pahnih chuah kan ni ta’ a ti ve bawk.
Joseph Zaia ruang hi vawin chawhnu 12 hian Ramhlun North Biak In mual-a an chenna Liankhuma (L) In, Taingova Colony-ah vui a ni ang.