Aizawl : BJP Mizoramin CADC inthlan lo awm tur atana campaign kharna hun CADC BJP pisa-a neih hmanpuitu Nagaland sorkara Tourism and Higher Education Minister Temjen Imna Along chuan BJP sorkar lohna state-ah PM scheme an pawngsual nasat avangin mipuiin nasa takin an tawrh phah tih a sawi.
Temjen Imna Along chuan Mizorama sorkar tawh ten Mizoram an enkawl dan hmuh hian, mahni ram enkawl tu te tih atana sawi ngam loh khawp hial leh an hming lam tlak loh khawp in Mizoram an kaihruai tih a sawi a. PM scheme hrang hrangte a nihna tur ang taka kalpui nise Mizoram sorkar tha a nei dawn niin a sawi.
Mirethei ten leirem an rah theihna turin PM Modi kaihhruai BJP sorkarah chuan chi inthliarna a tel ve lo nia sawiin Temjen Imna Along chuan, “Mi hausa leh retheite dinhmun a thliar hrang ve lo a. Hmun kilkhawr taka cheng te thleng phak hmasawnna a awm theih nan BJP chuan theihtawp chhuahin hma a la a. Pu Modi kaihhruai BJP a sorkar chuan CADC mipui te duhthusam leh beisei hmasawnna chu kan hmu thei dawn a ni,” a ti.
CADC area-a mipuite tan BJP party a ding reng dawn nia sawiin, state-ah leh CADC-ah MNF a sorkar chunga Mizoram dinhmun a chhe lutuk chu hriatthiam har a tih thu a sawi a. Central-a sorkar lai BJP hi CADC-ah sorkar tir a nih chuan hmasawnna nasa tak a thlen ngei tur thu a sawi bawk.
Campaign kharna inkhawmah hian BJP Mizoram Prabhari M Kikon, State President Vanlalhmuaka, Dr BD Chakma, MLA leh CADC BJP President ten an hman pui a ni.