Aizawl : Manipur tualchhung buaina avanga Mizoram mi tangkhangte hruai chhuak turin thawhtheihna charter lamah harsatna a awm avangin Mizoram sorkarin commercial flight hmanga thiar chhuak turin air ticket a lak sak.
Inrinnia Home Minister Lalchamliana hoa Manipur tualchhung buaina avanga harsatna hrang hrang awm sutkian dan turte sawihoin sorkar thuneitute an thukhawm a. Ruahmanna an siam angin Mizoram mi leh sa tangkhangte an lo haw theihna’n thlawhtheihna charter lamah harsatna a awm avangin commercial flight ticket laksak an ni a. Pathianni khan mi pali tan Imphal atanga Guwahati ticket book sak niin, Thawhtanni atan mi 35 tan, Thawhlehni-ah mi 20 tan, a vaiin Inrinni thleng khan ticket book fel tawh zat hi mi 59 a ni.
Hei bakah hian mi 78 tan thlawhtheihna hi a remchan dan anga ticket book hi hauh rih phawt a ni bawk.
He buaina hian eng chen nge a awh dawn tih hriat a nih loh avangin Manipur-a cheng Zohnahthlak zingah Mizoram lama insuan thla duh, tlang kawnga rawn luh ngai an awm theih avangin Ngopa khuaa petrol/diesel filling station te pawh POL chungchangah stock tam zawk nei thei tura ruahmanna siam a ni bawk.
Manipur tualchhung buaina a reh hma loh chuan Mizoram sorkarin a mi leh sa te hum turin leh harsatna an neih lohna turin theihtawp a chhuah zel a tum a. Chutihrualin, Mizoramah Meitei engemawzat an cheng ve a, Manipur lamah an duh loh tak thil a thleng a nih pawhin helaia cheng Meitei ten an tawrh ve na tur awm ang zawng a hmalak leh thil thleng awm lo turin Mizoram sorkarin Mizoram mipuite a ngen.
Thutkhawmah hian Home Minister Lalchamliana chuan Manipur-a Zohnahthlakten harsatna nasa tak an tawk a, nunna chan hialte pawh an awm chu pawi a tih thu a sawi a. Manipur-a thil thleng chu Mizoram sorkarin uluk takin a ngaihven reng thu leh, Mizoram mi leh sa leh Zohnahthlakte an sahimna turin theihtawpa hma lain kawng a dap mek tih a sawi a. Hetih rual hian Mizorama cheng Mizo mipuite chuan Manipur-a cheng Mizote tan a duhawm lo zawnga nghawng a neih loh nan tharum thawhna lam hawi zawnga che lo turin a ngen bawk.