Naktuka Chakma Autonomous District Council inthlanna tur atana campaign theih hun chu nimin tlai dar 5 khan a tawp ta.
Campaign theih hun hi a tawp tak avangin helai hmuna vote nei lote chu CADC huam chhung chhuahsan tawh tura tih an ni.
Inthlanna hi May Thawhlehniah neih a ni anga, zing dar 7 atanga tlai dar 5 thleng vote thlak theih a ni ang a. Vote tlate hi Ninganiah chhiar a ni ang.
Hetihlai hian BJP candidate a thih avangin Rengkashya bial bikah hian Thawhlehniah inthlan a awm ve dawn lo va. State Election Commission chuan he bial bik atan hian May 17-a inthlanna buatsaih turin hriattirna a chhuah tawh a ni.
Lawngtlai district-a CADC inthlanpui buaipuituten an sawi danin Ningani zana BJP leh MNF tantute intihbuaina a Rengkashya bial BJP candidate thah leh mi dang paruk an hliam tih bak chu tharum thawhna leh buaina lian tham a awm rih lo.
CADC-a mipui thlan theih bial 20-ah hian BJP, Congress leh MNF chuan candidate an nei kim vek a. ZPM erawh chuan bial 13 an chuh a. CADC bial 20 inthlanna chuh tur hian candidate 73 an awm a ni.
Bial 13 hi kil li atanga inchuh a ni a, bial sarih chu kil thuma inchuh a ni ang.