Mizo Zirlai Pawl (MZP)-in Manipur tual chhung buaina avanga Churachandpur-a Mizo zirlai tangkhang mi 34-te chu nimin khan Mizoramah an hruai haw.
Mizorama hruai hawte hi Bethesda School of Nursing, Churachandpur-a zirlai tangkhangte niin an vaiin mi 34 an ni a, Aizawl, Lunglei, Lawngtlai, Mamit leh Kolasib district khaw hrang hrang a mite an ni a. Assam leh Meghalaya-a cheng Mizote pawh an tel.
MZP thuchhuahin a tar lan danin state hrang hrangin Manipur tual chhung buaina avanga tangkhang an mi leh sa, an zirlaite an lakchhuah zel avangin Mizo zirlaite lakchhuah hna a thawk a. Zirlai hruai chhuak tur hian an president Lalnunmawia Pautu hoin an kal a ni.
MZP chuan zirlaite hruai hawna kawnga theihtawp chhuahpuitu Siamsinpawlpi (SSPP) General Headquarters leh ZRA te chungah lawmthu an sawi nghal bawk.