Central YMA chuan nimin Central YMA Hall, Tuikhuahtlangah Aizawl khawpui chhunga branch YMA hruaitute a ko khawm a, Manipur chhung buaina thleng meka Zohnahthlakten harsatna an tawh chungchang an ngaihtuah ho a, harsatna tawkte tan tanpuina pawisa khawn an rel.
He inhmuhkhawm hi Central YMA President R Lalngheta’n a kaihruai a, General Secretary Prof Lalnuntluanga’n report hrang hrang a pe a, Manipur Group YMA hruaituten thil thlen dan leh nunna chânte bakah tanpui an ngaih dante report an pe a ni.
Aizawl khawpui chhung branch YMA kalkhawmte chuan Zohnahthlak harsatna tuar mekte tanpui nan mahni branch huam chhung theuhah tanpuina sumfai khawn an rel a, hemi kaihhnawiha raltlan lo lutte chu tha taka lo dawnsawn vek ni se an ti a. Mahni branch YMA huam chhung theuha raltlan lutte chhinchhiahna Central YMA-in form a siam hmanga uluk taka lo chhinchhiah vek nise, tiin an rel bawk.
Inkokhawmnaah hian Aizawl khawpui branch YMA hruaitu mi 86 bakah CEC 40 leh OB mi paruk bakah Manipur Group YMA aiawh mi panga an tel a ni