Aizawl : MPCC Vice President Lal Thanzara chuan ram hrang hranga awm Zofate hi engtik niah emaw rorelna pakhat hnuaia an la awmkhawm ngei a beisei tih a sawi.
Inrinnia Mamit East Block Congress Committe-in Rawpuichhipa Block Conference an neih a hmanpuinaah Lal Thanzara chuan thu sawiin, Manipur-a BJP sorkarna hnuaiah chi leh chi intihbuaina a thleng mek hian BJP zia a tilang chho tan mek tih a sawi a. Hetiang buainaah Mizote an inpumkhat a, an inthurual a ngai tih a sawi.
Burma, Manipur, Bangladesh leh Tripura-te hi political boundary-in then hrang mah se, Zofate thinlung hi hmun khat a nih thu sawiin Lal Thanzara hian, “Ram hrang hrangah thendarh ni mah ila, engtik niah emaw chuan Zofate hi rorelna pakhat hnuaiah kan la awm ngei ka beisei a ni,” a ti.
Congress party chu remna leh muanna thlentu a nih tih sawiin MPCC Vice President hian India ramin zalenna a neih theihnan Kristian pachal AO Hime chuan Indian National Congress a din a. MNF avangin kum 20 chhung Mizoram chu ram buaiah awmin mipui an rethei em em a. Zoram mipuiin an mamawh ber chu remna leh muanna a nih avangin Congress party chuan remna leh muanna a awm theih nan an sorkarna chu MNF kutah hlanin, Mizoramin remna leh muanna a neih phah ta tih a sawi.
Lal Thanzara chuan Mizoramin remna leh muanna a neih dawn khan rorelna kha central lama Congress sorkarin thuneihna ken a remtih loh laiin, khatih laia chief minister Lal Thanhawla erawh chuan thuneihna an ken loh chuan remna leh muanna a awm thei dawn lo tih a hriat chian avangin a kian nia sawiin, “Remna leh muanna kan neih theih phah a ni,” a ti a; engmah tih nei lo anga Congress party puhtute hian remna leh muanna hlut zia an hre chiang tawk lo tih a sawi bawk.
Inkhawm hi Mamit East Block President Liannghinglova’n a kaihhruai a ni.