Aizawl: ZPM Working President K Sapdanga chuan ram chhunga ZPM thli a tleh tih chu anmahni chauh ni lo, anmahni duhsaktu leh dodaltute pawhin an pawm vek tih a sawi.
Thawhtannia ZPM chhung inkhawmah thusawiin K Sapdanga hian tunlai Mizoram politics chanchina sawi tam ber chu ZPM chanchin a ni a, ZPM thli tleh hi eng hun atanga tleh tan nge rin thiam a har rualin, thli sulhnu langsar taka hmuh leh hriat fiahna chiang tak chu Lunglei Municipal inthlan kha a nih theih thu a sawi.
K Sapdanga hian Lungleia ZPM thli tleh chhan chu RT-PCR khawl bun duh loh vang te, by-pass road siam duh loh vang te, kawng chhiat vang te nia rinna chu a dikin a dik lo thei tih sawiin, “A hnu lawkah kha thli tho kha Zemabawk leh Leitan-ah a tleh leh a, RT-PCR leh by-pass road awm ve lohna hmunah pawh na takin a tleh tho mai,” a ti.
“Inthlan dawn apiangin politics thli hi a tleh thin a, sum leh therhlo vang tein a ni fo bawk thin. Mahse, Lunglei mipui rilru chhem kaltu thli te, Zemabawk leh Leitana thli bing tleh te kha chu sumin a tlehtir a ni lo tih hrechiangtute chu mipuite kan ni,” a ti bawk.
ZPM hi inti-Kristian bik, inti-Kohhran bik, inti-Pathian thuawih bik leh chu chu chapopui ta viau anga puh an nih reng thu sawiin K Sapdanga hian, “Kan president te, kan chief ministerial candidate te pawh pawh kohhran upa min an nih vang te pawh a ni ang, kan lakah mi thikthu a chhiain beiseina an nei sang bik niin a lang a. Chuvangin, party mipuite kan chapo tur a ni lo,” a ti a; thli siamtu Pathian lamah rilru dik pu turin theihtawp chhuah a, rilru hmun khat puin a duhna lam hawia thli tlehtir thintu duhzawng hi an ngaihpawimawh zel a tul tih a sawi.
ZPM chhung inkhawm hun K.Lalrinsiama, Secretary-in a kaihruai a, ZPM Leader Lalduhoma pawhin thu a sawi bawk.