Mizoram sorkar ruahmannain Manipura Mizoram mi tangkhangte chu hruai hawte chuan anmahni buaipui kawngah Mizoram sorkar chu a che tlai lo tih an sawi.
Airport an thlen hian The Zozam Times-in tangkhang hawte hi a kawm a. All Mizo Medical Students Union (AMSU) hruaitute chuan social media-ah Manipur-a Mizo tangkhangte buaipui kawngah Mizoram sorkar chu che muanga hma la tha tawk lo angin demna awm mah se buaipuina dawngtute erawh sorkar chu che muang an tih lo tih an sawi a, RIMS bika zirlai, state dang mite pawh an rual thoin hruai chhuah an nih thu an sawi.
AMSU hruaitute chuan Manipur-ah Mizoram mi, medical zirlai 121 an awm a, PG zirlai chhungte nen chuan mi 130 bawr vel an awm thu an sawi a, chung mite zingah chuan buaina chhuak avanga harsatna tawk, kut tuar an awm an hriat loh thu a sawi.
Hetihlai hian tangkhang haw zinga mi, Reiek pa, PC Zatluanga erawh ni thum chhung CRPF camp-a an awm chhung khan Mizoram sorkar hmalakna chu an nghakhlel hle tih The Zozam Times hrilhin, “Kan awmna hmun kha a nuam lo bawk nen, ‘sorkar chu che vat vat se, min hruai chhuak vat vat se’ kan ti a; mahse, hei tunah kan ramah hruai thlen kan ni ta a, kan lawm khawp mai,” a ti.
PC Zatluanga te chhungkua hi an chhungte lusun hnem turin May 3 zingah Imphal an thleng a, an thlen hlimah pawh Metei lamin total bandh an neih avangin an kal tumna tak an kal thei lo a, Game Village-ah an tute bulah an thlen tak thu a sawi a. Hemi tlai hian Metei-te chu an chenna hmunah rawva takin an che a, an thlenna in tak chu khawi loh mah se an bul hnaia inte chu an hal a, silai nasa taka hmeh puah a nih thu a sawi.
May 3 zanah an tlaivar zak a, khawvar dawn hnaiah CRPF camp-ah tlan khawm tura tih an nih angin phurh thlen an nih thu PC Zatluanga chuan a sawi a. Camp-ah chuan mi 5,000 vel an awm a, an tam tham em avangin ei leh in tur pawh an in dah lo hle tih a sawi a, an awmna hmunah hian tihduhdah an tuar lo tih The Zozam Times a hrilh.
Nimina tangkhang thlengte hi Mizoram sorkara Cabinet Minister Er Lalrinawma leh sorkar hotu dangten airport-ah an lo hmuak a, tangkhang lo hawte pual hian inlawmna inkhawm tawi buatsaih a ni.
He huna thusawitu, Minister Er. Rinawma chuan Mizoram sorkarin a khua leh tuina himna a ngaih pawimawh thu te, harsatna an tawhah a thlahthlam dawn loa, an tan a ding reng dawn tih a sawi a, heng ang hun harsaa hian hruaitu huaisen, a ngaihna hria, thuthlukna dik siam thin an awm a ngai tih leh tangkhang leh Manipura Zohnathlakte tana Mizoram sorkar hmalakna chu ropui a tih thu a sawi a ni.
Mizoram sorkarin ruahmanna a siam dan chuan nimin khan Indigo, Air Asia leh Air India thlawhna hmangin mi 37 te Imphal chhuahsanin Guwahati an pan leh a, vawiin hian Indigo, Air Asia leh Air India thlawhna hmangin mi 28 te Imphal chhuahsanin Guwahati an pan leh dawn a ni.