West Bengal state sorkar chuan tunlaia ramchhunga sawihlawh tak, ‘The Kerala Story’ chu chhuah a khap ta.
He film trailer tihchhuah phat atang khan buaina neuh neuh a tawngbaw chho nghal zut zut a, state thahnem takah dodalna a tawk.
West Bengal CM Mamata Banerjee chuan an state chhunga he film chhuah khap a nih thu hi nimin khan a puang a, ‘BJP-in Bengal-ah Kashmir Files ang film lam hawi siamna kawngah sum a thawh’ tia a puh hnu lawka a thuchhuak langsar tak a ni.
CM hian state chief secretary hnenah state huam chhunga cinema hall reng renga chhuah a nih lohna tura hmala turin a hriattir nghal a. Heti anga chhuah khap bur a nih chhan hi Bengal-a remna leh muanna a awm zel theih nan te, tharum thawhna leh inhuatna pumpelhna theih nan a nih thu a sawi.
BJP state president Sukanta Majumdar a lungawi lova, TMC sorkar hmalakna na taka a dem bakah Mamata Banerjee chu thil nihna dik tak hmu chiang ngam lovah a puh bawk.