Grid-a pakuana atanga bul tanin Max Verstappen chuan Pathianni Miami Grand Prix-ah pakhatna dinhmun luah lehin, a hma chiah intlansiaka a hneh loh Red Bull driver dang Sergio Perez kha pahnihnaah thleng ve thungin, US leilungah Red Bull one-two finish hmuh tur a awm leh.
Dutch driver Verstappen hian championship kal laia a hmahruaina pawh sawhnghet leh sauhin, tun kha Formula One intlansiaka Red Bull team-in tum 26 zet one-two an hlawhchhuahna a ni ta!
Max Verstappen-a team-mate Perez chuan pole position atangin bul tan bawk mah se title race-a a elpui lian ber a dang zo ngang lo.
Lawmman semna dawhsan hniam ber luahtu Fernando Alonso chuan season kal laia a chetthat chhunzawmin intlansiak vawinga zawh tawhah a tum lina atan Aston Martin chu ‘podium’ a lawnpui a, pathumna niin, a hnung chiahah Mercedes khalhtu George Russell a thleng ve bawk.
Carlos Sainz chuan Spaniard Alonso hi hmakhalh tum ve ngar ngar bawk mah se pit stop a lak laia pit lane-a a tlanchak avangin ‘five-second penalty’ a hmu a, a Ferrari car chu panganaah thlenpuiin, a team-mate Charles Leclerc nena an inkarah parukna luahtu Mercedes driver leh world champion vawi sarih tehreng ni tawh bawk Lewis Hamilton kan hmu ve bawk.
Pathianni hnehna kha a career-a Verstappen-a tum 38 chakna ni tawhin, Red Bull car khalh chunga chak hnem ber record chelhtu Sebastian Vettel a nihrualpui chiah.