India-a West Bengal state chuan hmeichhe pathum, Islamic State (IS) firfiak pawl zawm tate chanchin behchhana film siam chuan tharum thawhna a vulh lian thei tiin an huam chhunga chhuah a khap.
‘The Kerala Story’ hi Kerala-a hmeichhe pathumin ‘firfiaka chetna’ zawma an kal dan tar lanna a ni.
A film siamtute chuan kum tam tak chhung an zir chian hnuah an siam chauh tih an sawi a; mahse, sawiseltu tam tak chuan ngaihdan leh pawm dan thehdarhna hmanrua niin an sawi.
West Bengal sorkar chuan muanna vawn nun zel a nih theih nan film hi chhuah a khap ta a ni.
BJP hruaitu tam tak erawh chuan he khapna hi an sawisel ve bawk a. BJP hi ram puma roreltu ni mah se West Bengal-ah hi chuan Trinamool Congress-in thuneihna changin eptu zawkah an tang mek.
BJP hruaitu, sorkar laipui leh state-a mi tam takin he film hi chhuah an duh a ni.
BJP rorelna state pahnih, Uttar Pradesh leh Madhya Pradesh-ah phei chuan he film atang hian chhiah pawh an la dawn lo (tax-free) ti hialin an sawi.
Union Minister Anurag Thakur chuan West Bengal sorkar hian firfiak pawlte a haw lovin ‘firfiaka chetna tuartute’ a haw zawk niin a sawi.
Prime Narendra Modi-a pawhin kar hmasa khan Karnataka inthlan tura a campaign-naah he film hi a fak a, ‘firfiakna hnuhma tam tak a pho lang’ niin a sawi.
West Bengal-in an khap hma lawk hian Bollywood lemchang thiam, Shabana Azmi chuan khap chu tul a tih loh thu Twitter-ah a tar lang.
The Kerala Story, hi Zirtawpni khan tlangzarh a ni a, a hma pawhin sawi a tam hle tawh a. November thlaa teaser tihchhuah a nih khan a changtunu chuan an state atanga Islam firfiak pawl zawmtu hmeichhe 32,000 zinga tlem behchhana siam a nih thu a sawi.
Sawiselna a nasat zui em avangin a siamtute chuan YouTube-a a hrilh fiahna an dah tharah chuan ‘Kerala hmun hrang hranga cheng hmeichhe naupang tak tak pathum chanchin behchhan’ tiin an dah.
Kerala sorkar chuan he film hian ‘inhuatna’ thehdarhna a nih thu a sawi a, khap erawh a khap ve lo.
An thenawm, Tamil Nadu-ah chuan multiplex neitu pawl chuan sawiselna a nasat em avangin an chhuah chhunzawm dawn rih lo an ti bawk.
A hmain Kerala High Court chuan a film tlangzarh hun sawn tura thu thlen chu a hnawl a. Karlehah hian Supreme Court-in high court thutlukna siam khinna chu a ngaihtuah bawk ang.